Арассыыйа эбэ хотун үрдүнэн саамай элбэх эргэрбит хаарбах туруктаах дьиэ Сахабыт сиригэр баар. Быйыл төһө үп көрүллэрин туһунан салгыы ааҕыҥ.
Сергей Кылбанов, СӨ Дьиэ-уот тутуутун дириэксийэтин генеральнай дириэктэрин солбуйааччы:
— 2019-2020 сылга уопсайа 85775 м2 иэннээх хаарбах дьиэ көтүрүллүөхтээх. Ол иһигэр саамай элбэх эргэрбит дьиэ Алдаҥҥа 10 506 м2, Ленскэйгэ 10 702 м2, Нерюнгри оройуонугар 13 434 м2 баар, онтон дьону көһөртүөхпүт. Дьокуускай куоракка 7 727 м2 иэннээх хаарбах дьиэлэртэн быйыл ыаллар көһүөхтэрэ.
Биһиги кинилэри тутулла турар, эбэтэр тутуллан бүппүт дьиэлэргэ кыбартыыранан хааччыйабыт, биитэр компенсация харчытын биэрэбит.
Хамсаабат баай-дуол сыанатын быһаарар лицензиялаах анал тэрилтэ хаарбах дьиэ сыанатын чуолкайдыыр. Эргэ кыбартыыра сыанатын быһарга оройуонун, сирин учаастагын көрөллөр уонна муниципальнай тэриллии иһинэн хамыыһыйа ону бигэргэттэҕинэ, хаарбах дьиэлэри атыылаһан ылан, компенсация харчытын кээмэйин чопчулууллар.
Саҥа тутуллар дьиэ сыанатын Тутуу министиэристибэтэ быһар, холобур, Дьокуускайга билигин биир квадратнай миэтэрэ 74 876 солкуобай. Муниципальнай кыбартыыраҕа олорор дьон саҥа дьиэнэн буор босхо хааччыллаллар, оттон хамсаабат баайы-дуолу бас билээччилэр муниципальнай тэриллии хамыыһыйатын быһаарыытынан эргэ уонна саҥа дьиэ сыанатын араастаһыытын төлүөхтэрин сөп.
Хаарбах дьиэттэн көһөр дьон тус бэйэлэрэ быһаараллар: харчынан ылаллар, эбэтэр саҥа тутуллар дьиэҕэ, биитэр урут тутуллубут дьиэлэртэн кыбартыыранан хааччыллаллар.
Саахалланар туруктаах эргэ дьиэттэн дьону көһөрөргө быйыл 6 миллиард 240 мөлүйүөн 754 тыһыынча солкуобай көрүлүннэ.
Елена Будаева, Мииринэй оройуонун хомунаалынай тутууга управлениетын оҥорон таһаарыыга отделын начаалынньыга:
— «Дьиэ-уот уонна куорат эйгэтэ» диэн национальнай бырайыак чэрчитинэн, дьон олороругар сөбө суох эргэ дьиэлэри көтүрүү федеральнай бырагыраама үлэлиир. Ол хайысхатынан, Мииринэй оройуонугар 2019-2025 сылларга 21 317,05 м2 иэннээх 57 элбэх кыбартыыралаах дьиэни көтүрэн, 1182 киһини көһөрүөхпүт.
2019-2020 сылларга хаарбах дьиэттэн дьону көһөрөргө Мииринэй оройуонугар 108 мөлүйүөн солкуобай тыырыллыаҕа.
Марианна Тыртыкова, «Саха сирэ» edersaas.ru