Хара Алдан олохтоохторо бырабыыталыстыба 2019 сыллаах үлэтин иһиттилэр
Таатта улууhун Хара Алдан нэһилиэгэр ситэриилээх былаас отчуота олунньу 18 күнүгэр ыытылынна.
1984 сылтан чөл олоҕу тутуһар ураты нэһиэлик сүрүн кыһалҕатынан киин ититии ситимигэр холбонуу буолар. Билигин 20-чэ ыал уонна социальнай эбийиэктэр холбонон олорор модульнай хочуолунайдара кыамтата кыра буолан, кэтэх ыалы холбуур кыаҕа суох.
Ону таһынан, ыччат, саҥа үлэлии кэлбит исписэлиис интэриниэт суоҕуттан нэһилиэккэ олохсуйбатын олохтоохтор кэпсээтилэр.
Нэһилиэнньэ бырабыыталыстыба 2019 сыллаах үлэтин үчүгэй диэн сыаналаан туран, сүрүн кыһалҕаларын быһаарары туруорсар. Бу олус ыраах, саас, күһүн суола суох хаалар нэһилиэк сүрүн көрдөһүүтэ биир — киин ититии ситимигэр холбонуу. Маны сэргэ сааскы халааҥҥа бэлэмнэнии үлэтин эрдэттэн ыытыы туһунан кэпсэттилэр.
Оскуола-саад дириэктэрэ Ольга Самсонова кэлэр үөрэх дьылыгар омук тылын учууталын нэһилиэгэр биһиги таһаарыыбыт нөҥүө ыҥырар. Былырыын учууталларга анаан түөрт кыбартыыралаах толору хааччыллыылаах саҥа уопсай дьиэ үлэҕэ киирбит. Онон, олорор усулуобуйа баарын иһитиннэрэллэр.
Ньургуйаана Иванова, edersaas.ru