Бэҕэһээ, ахсынньы 16-гар, Томпо улууһун киинигэр — Хаандыгаҕа түмүктэммит хапсаҕай федерациятын XXII Кубогар киин куорат хапсаҕайдьыттара былырыыҥҥы ситиһиилэрин чиҥэтэн, бэһис төгүлүн өрөспүүбүлүкэ күрэһин кыайыылааҕынан буолары ситистилэр.
edersaas.ru
Уон биир улуус бастыҥнарыттан сүүмэрдэммит хамаандалар икки бөлөҕүнэн күрэстэһиилэрин түмүгэр, Дьокуускай уонна Үөһээ Бүлүү бөҕөстөрө кыайыылааҕы бэйэлэрин икки ардыларыгар быһаарыстылар, үһүс миэстэни бүлүүлэр итиэннэ таатталар былдьастылар.
Быйылгы күрэс арыйыытынан буолбут таатталар бөлөхтөрүгэр Дьокуускай, Амма, Сунтаар, Хаҥалас курдук күүстээх бөҕөстөрдөөх хамаандалары кытта турууластылар. Бастаан төһө да киин куорат хапсаҕайдьыттарыгар күппүлүү бардаллар (14:3), салгыы бэйэ бодотун тардынан, сунтаардары уонна хаҥаластары иккиэннэрин тэҥ — 10:7 ахсаанынан баһыйдылар. Аммалары кытта быһаарыылаах хапсыһыыга ахсаан 8:8 буолан турдаҕына, түһүлгэҕэ ыарахан ыйааһын бөҕөстөрө Леонид Попов (Таатта) уонна Степан Гаврильев (Амма) ыҥырыллаллар. Тэҥ баайыылаах бөҕөстөр тыҥааһыннаах киирсиилэрин тиһэх мүнүүтэтигэр эрэ Таатта талах курдааҕа утарылаһааччытын бүдүрүтэн кыайыыны ыһыгыннарар!
Салгыы бүлүүлэри кытта боруонса мэтээли былдьаһыыга, эмиэ эрбии тииһинии эрийсиилээх күөн көрсүүгэ, хамаандатыгар олус наадалаах очукуону Клим Иванову бүдүрүппүт Александр Халыев аҕалла. Оттон Леонид Попов өрөспүүбүлүкэ биир күүстээх хапсаҕайдьытын Николай Николаевы хотон ситиһиини ытаһалаан биэрдэ.
Дьокуускай уонна Үөһээ Бүлүү хамаандаларын кыайыылааҕы быһаарар күөн көрсүүлэрэ эмиэ олус диэн эрийсиилээхтик барда. Манна киин хапсыһыынан Прокопий Петров — Федор Данилов киирсиилэрэ буолла. Ахсаан 6:8 буолан турдаҕына, Петровтан кыайыы эрэ эрэйиллэрэ. Оччотугар эрэ киин куорат хапсаҕайдьыттара Кубокка чарапчыланар толору кыахтаналлара. Ол эбэтэр үөһээ бүлүүлэргэ хаалбыт ыарахан ыйааһыннарга күүстээхтэн күүстээх Иннокентий Иннокентьев уонна Увар Тимофеев бараҥнаһаллара. Оттон кинилэртэн кыайыыны ыһыгыннарар олус диэн ыарахана сэрэйиллэрэ…
Иэмэх мастыы эрийсиилээх хапсыһыы түмүктэниитэ икки сэрэтиинэн кымньыыланан Федор Данилов бэдэр кыыллыы сымсатык утарылаһааччытын атаҕар ыстаммытын, Прокопий Петров кыл түгэнигэр урутаан, утары албаһынан киһитин бастакынан көбүөрү таарыйтарар. Итинэн көҥүл тустууга Арассыыйа 2002 сыллааҕы чөмпүйүөнэ өрөспүүбүлүкэ биир чулуу хапсаҕайдьытын аатын түбэспиччэ сүкпэтин өссө биирдэ итэҕэттэ. Онон ахсаан 6:9 буола түһэр. Салгыы, көһүтүллүбүтүн курдук, Иннокентьевтаах Тимофеев күөн көрсөөччүлэрин – Никита Валеевы, Прокопий Хабаровы —төһө да эрэлээхтик кыайдаллар, уопсай түмүк 9:8 ахсаанынан дьокуускайдар туһаларыгар буолла.
Ити курдук, тириэньэр Станислав Афанасьев салалтатынан киин куорат хапсаҕайдьыттара федерация Кубогын эһиилгэ диэри илдьэ хааллылар.
Роман Попов, edersaas.ru
Хаартыска Интэриниэттэн ылылынна.