Саҥа сылга үктэнээт, үгүс киһи үлэтигэр, тус олоҕор туруоруммут сыалын-соругун хайдах ситиһиэхтээҕин былаанныыр. Туох да диэбит иһин, билиҥҥи олоххо халыҥ харчылаах киһи баҕа санаатын дөбөҥнүк ситиһэр, дьиэ-уот, массыына, гараас атыылаһар.
edersaas.ru
Онон баҕа санааҕар бастатан туран, хамнаһыҥ эппиэттэһиэн наада, онтон харчыҥ төһө халыҥа ханна үлэлииргиттэн быһаччы тутулуктаах. Ол эрэн, үгүс дьон тэрилтэ салайааччытыгар киирэн, хамнаһы үрдэтэр туһунан кэпсэтиини саҕалыан кыбыстар, эбэтэр толлор.
HeadHunter сулууспа: “Билиҥҥи хамнаһыҥ тиийэр дуо?” – диэн Арассыыйа 5245 олохтоохторуттан 2019 сыл ахсынньытыгар туоһуласпыт. Онтон 74% хамнаһын астымматын туһунан эппит. Хамнас тиийбэтин үксүн айар үлэ, массмедиа, баан, дьаһалта үлэһиттэрэ, куттала суох буолууну хааччыйааччылар бэлиэтээбиттэр.
Үлэһит 77% тулуйа сатаан баран салайааччыга киирэн, хамнас хаһан үрдүүрүн туоһулаһар эбит. Ол эрэн ити кэпсэтии түмүгүнэн кинилэртэн 42% эрэ хамнастара эбиллибит. Чуолаан, эр киһи хамнаһын дьахталлардааҕар дөбөҥнүк үрдэтэллэрэ биллибит.
Хамнаһы эбэр уолдьаспытын туһунан салалтаны кытта долгутуулаах кэпсэтиигэ үгүс үлэһиттэр сүрүн төрүөт быһыытынан үлэҕэ ситиһиини, идэ таһымын үрдэтиини уонна хамнас хас да сыл үрдээбэтэҕин ыйаллар диэн HeadHunter сулууспа кэтээн көрбүт. Ол эрэн үлэһитин сыаналыыр тэрилтэҕэ саамай тиийимтиэ: «Миигин атын сиргэ, өссө үрдүк хамнастаах үлэҕэ ыҥырдылар», — диэн этии буолар. Ити аргумены туттубут дьон 49% хамнастарын тута үрдэппиттэр.
Биллэн турар, маннык харса суох хардыы үлэ ырыынагар талбыт үлэҥ баар сиригэр сүнньүнэн улахан куораттарга сөп түбэһэр. Уйулҕа үлэһиттэрэ кэтээн көрүүлэринэн, бэйэтигэр эрэллээх киһи үрдүк хамнаска дураһыйар, сылаас сиртэн тахсартан куттаммат өттө олоҕор элбэҕи ситиһэр.
Онон тойоҥҥутун кытта хамнас туһунан кэпсэтиигэ ханнык куоһуру туттаргытын бэйэҕит сэрэйэн көрөн билэр буолуохтааххыт. Сыаналаах табаар – хаачыстыбалаах диэбит курдук сорох салайааччылар үрдүк хамнаһы көрдүүр үлэһит ол аата кыахтаах, чиҥ билиилээх, баай уопуттаах диэн өйдүүллэр. Хайа баҕарар түгэҥҥэ баар боппуруостары түргэнник быһаарар, кыһалҕа үөскүөн иннинэ ону туоратар, тэрилтэҕэ көдьүүстээх, туһалаах, үлэҕэ бэриниилээх дьоҥҥо наадыйаллар.
Марианна Тыртыкова, «Саха сирэ», edersaas.ru