Кэбээйи улууһугар өссө олунньуттан саҕалаан оҕуруот аһын олордуунан дьарыктанан барар оҕуруотчут ыал ийэтэ үгүс.
edersaas.ru
Кэбээйи нэһилиэгэр дьон оҕуруотунан соччо үлүһүйэ илигинэ дьарыктанан саҕалаабыт Агафья Максимова буолар.
Агафья Семеновна арассаадаларын кулун тутартан олордон барар. Онтон муус устар ый саҥатыттан оһоҕунан оттуллар парнигар көһөрөн таһааран, араартыыр, сороҕун олордор. Ол да иһин буолуо, дьиэҕэ үүнэн турар иинэҕэс арассаадалардааҕар Агафья Семеновна үүнээйилэрэ олох ураты буолаллар.
Хаппыыстатын, оҕурсутун ыам ыйыттан саҕалаан олордор. Ити үүннэрбит арассаадаларын атыылаан дохуот да киллэринэр, үгүс оҕуруотчуту да абырыыр.
— Көмөлөһөөччүлэрим үгүс. Сиэннэрим уу кутуһаллар, араас сорукка да сүүрэллэрэ баһаам. Уоҕурдуу буорун таһыыга, ууну-хаары аҕалыыга кинилэр көмөлөрө суох табыллыбаппын, —диэн оҕуруотчут киэн тутта кэпсиир.
Агафья Семеновна тэлгэһэтиттэн биир да суотай сир мээнэ хаалбат. Уурбут-туппут курдук күрүөлээх олбуор иһэ толору сибэкки арааһа.
Кини үүннэрбит оҕуруотун аһын, биири да хаалларбакка, күһүн устата кэнсиэрбэлиир, харайар уонна өссө итиччэ элбэх сиэнтэн, оҕоттон ордорон, хайаан да күһүҥҥү дьаарбаҥка-быыстапкаларга, улуустааҕы ас-үөл быыстапкаларыгар кыттан, аата-ахсаана биллибэт кырааматаны, сыаналаах бэлэҕи тутар.
Бу күннэргэ Агафья Максимова халыҥ «аармыйатын» — сиэннэрин мунньан, үлэ үөһүгэр сылдьар.
«Саха сирэ» хаһыат, edersaas.ru анаан
Татьяна МАКСИМОВА-ЛАЗАРЕВА,
Кэбээйи улууһа.