Халаан: уу таһыма өссө үрдүөҕүн сабаҕалыыллар (видео)

Бөлөххө киир:

Уһун ардахтар түһэннэр, Өлүөнэҕэ уу таһыма үрдүү турар. Билигин Дьокуускай аннынан 186 см үрдээн, 355 см тэҥнэстэ. От ыйын 21 – 23 күннэригэр өссө үрдүөҕүн Уу ресурсаларын федеральнай агентствотын Өлүөнэ сүнньүнээҕи ууга управлениета сабаҕалыыр.

www.edersaas.ru

Ленскэй аннынан уу таһыма 722 см, Өлүөхүмэҕэ 846 см тиийдэ. Токо аттынан Чаара үрэх уутун таһыма сууккаҕа 87 см түһэн, билигин 651 см тэҥнэстэ. Манна кутталлаах таһым 900 см. Онон Дьаархан нэһилиэгин баһылыгын дьаһалынан ыксаллаах быһыы-майгы эрэсиимэ көтүрүлүннэ.

Алдан өрүс хайысхатынан уһуннук ардаан, Уус Маайа, Томпо улуустарыгар уу таһыма үрдээтэ.

Орто Халыма улууһун дьаһалтатын чахчыларынан, Сыбаатай аннынан уу улаханнык түһэ илик. Суукка иһигэр баара-суоҕа 4 см намтаан, билигин 752 см тэҥнэстэ. От ыйын 19 күнүнээҕи туругунан, 33 дьиэ тиэргэнин уонна социальнай суолталаах 8 эбийиэги уу ылан, ыксаллаах быһыы-майгы эрэсиимэ көтүрүллэ илик.

Арҕахтаахха уу таһыма 897 см (кутталлаах таһым 777 см). 46 тиэргэн, ол иһигэр 19 чааһынай дьиэ олоччу ууга «олорор».

Андрюшкино таһынан уу таһыма үрдүүр. Чугастааҕы күннэргэ Арҕахтаах – Андрюшкино учаастагынан уу таһыма өссө үрдүүр чинчилээх.

Хаартыска уонна видео: СӨ Айылҕа харыстабылын миниистирэ Сахамин Афанасьев.

Анивера Акимова, «Саха сирэ» хаһыат, www.edersaas.ru

+1
0
+1
0
+1
0
+1
0
+1
0
+1
0
+1
0