“Үтүө дойду – Хаатылыма” диэн бу дойдуттан силис тардар саха норуодунай артыыһа Аркадий Алексеев Саха тэлэбиидэнньэтинэн хас да түһүмэхтээх биэриилэрин кэнниттэн Мэҥэ Хаҥалас улууһун бу биир, трассаттан тэйиччи, ойдом соҕус турар, олус кэрэ айылҕалаах сэлиэнньэтин туһунан өссө элбэх киһи билбитэ.
edersaas.ru
Сайыҥҥы кэмҥэ Хаатылымаҕа киһи үгүс. Олохтоохторго, биллэн турар, от үлэтин үгэнэ. Сарсыарда аайы араас тиэхиньикэ ходуһа диэки субуллар. Ыанньык ынахтар сарсыардааҥҥы ыам кэнниттэн эмиэ алаастарга тиэтэйэллэр… Оттон оҕо-уруу сүүрэр-көтөр, оонньуур, куйаас күннэргэ сөтүө бөҕөтө этэ. Уоппускалаахтар сир астыыллар. Эбэҕэ киирэн көмүс хатырыктаахха илим үтэллэр…
Олохтоох дьаһалта хонтуоратыгар, пандемияны учуоттаан, биллэн турар, мааскалаах киирэҕин. Ааҥҥа тумбаҕа икки көрүҥ дезинфекциялыыр сириэстибэ турарыттан, биирдэрин ылан, илиигин обработкалыыгын. Уонна дьэ, социальнай дистанцияны тутуһан, үлэһиттэри кытта кэпсэтэҕиҥ.
– Окко быйылгы былааммыт 360 тонна. Бүгүҥҥү, от ыйын 31 күнүнээҕи туругунан, нэһилиэк үрдүнэн уопсайа 129 тонна от оттонно. Биһиги икки бааһынай хаһаайыстыбабыт уонна чааһынайдар ходуһаҕа үлэлэрин салгыы ыыталлар. Быйыл үүнүү мөлтөх соҕус. Эрдэ ардах түспэтэҕэ. Аны аһыыҥка дэлби сиэтэ. Ол да буоллар, кыра-кыра алаастары тирбэҕэлээн оттоон, отчуттар дьулуурдарынан, былаан туолуоҕа, – Хаатылыма нэһилиэгин тыа хаһаайыстыбатыгар исписэлииһэ Дария Михайлова от үлэтин хаамыытын билиһиннэрэр.
Хаатылымаҕа 2015 сыллаахха бастаан 2 саха боруодата атыыр оҕуһу аҕалбыттар. Онтон былырыын Александра Семеновна Игнатьева салайааччылаах бааһынай хаһаайыстыбата Саха Өрөспүүбүлүкэтин “Дьиэ кэргэн” гранын ылан, 20 саха сүөһүтүн аҕалан, иитэ, көрө-истэ сылдьар. Билигин саха боруодата хороҕор муостаах төрөөн-ууһаан, 27 төбө буолбут, онон, сүөһү “сахатыйан” эрэрин туһунан Дария Николаевна салгыы кэпсиир.
Александра Семеновна хаһаайыстыбата саха боруодата сүөһүнү тутарга анал тиэхиньикэ ылыммыт, аны саҥа хотон туттарыахтаах. Уонна эти астыыр сыах арыйыахтаахтар. Онон былаан кырата суох, үлэ элбэх.
Хаатылымаҕа дьон сүөһүтэ, ити курдук, сыллата син элбии турар. Үүт собуота – Павловскай филиала үлэлиир. Онон олохтоох үүтүнэн-сүөгэйинэн арыы оҥоро-оҥоро, Павловскай собуотугар туттараллар эбит.
Нэһилиэккэ баар өссө биир бааһынай хаһаайыстыбатын Василий Александрович Афанасьев салайар. Бу, сылгы иитиитинэн дьарыктанар бааһынай хаһаайыстыбатын Василий Афанасьев аҕата Александр Афанасьев (Чуурук) тэрийэн хаалларбыт.
Нэһилиэк олоҕор, дьоҥҥо өр сыл баҕа санаа буолан сылдьан баран, баһылык Ким Кимович Попов кыһамньытынан былырыын тутуллан, олоххо киирбит Тамма үрэҕи туоруур муоста улахан оруоллаах. Билигин нэһилиэнньэ дьыл хайа да кэмигэр үрэх уутуттан хаайтарбакка, Лоомтукаҕа, Майаҕа түргэнник тиийэр кыахтанна.
Татьяна МАРКОВА,edersaas.ru