Хаарбах дьиэттэн дьону көһөрөргө биир кэлим кыбаарталлар тутуллуохтара

Бөлөххө киир:

Арассыыйа үрдүнэн саамай элбэх эргэрбит хаарбах туруктаах дьиэ Сахабыт сиригэр баар. Саахалланар туруктаах, муостатын уу ылар, эбэтэр сууллар кутталлаах дьиэттэн көһөөрү дьон сылы сыллаан, сорох сорохтор муҥур үйэлэрин тухары күүтэллэр.

edersaas.ru

Хаарбах уонна саахалланар туруктаах дьиэттэн дьону көһөрөр бырагыраама чэрчитинэн тутааччылар саҥа дьиэҕэ көһөн киирээччилэргэ бары өттүнэн табыгастаах эйгэни тэрийдэхтэринэ, кэккэ чэпчэтиинэн туһанар кыахтаныахтара.

Өрөспүүбүлүкэ салалтата олохтоох бэйэни салайыныы уорганнара сөптөөх инфраструктуралаах бүтүн кыбаарталы тутан таһааралларын курдук үлэни ыытар.

«Алдаҥҥа, Нерюнгрига, Ленскэйгэ итинник ньыманы ылыммыттара. Мииринэй эмиэ кыттыһарын курдук сорудахтаабытым. Дьокуускайга эмиэ биир кэлим тутууну ыытар курдук куорат дьаһалтатын кытта үлэлэһиэхпит», — диэн этэр Ил Дархан Айсен Николаев.

ОДьКХ ситимин саҥардарга үлэлэһэр пуонда, госкорпорация салайааччыта Константин Цицин этэринэн, саҥа дьиэлэр тутуллубут оройуоннарыгар инфраструктураны киллэрэргэ тутааччыларга тустаах чэпчэтии көрүллүөҕэ.

Икки өрүттээх сөбүлэһии быһыытынан, ОДьКХ реформатын порталыгар киирэн, өрөспүүбүлүкэҕэ хаарбах дьиэттэн дьону көһөрүү бэрээдэгин онлайн ситимҥэ көрүөххэ сөп. Сахабыт сиригэр 2025 сылга диэри 10 мөлүйүөн кв.м. иэннээх саахалланар туруктаах дьиэттэн 600 тыһыынча киһини көһөрүөхтэрэ.

Оттон хаарбах дьиэттэн дьону көһөрөр кыбаарталлар Дьокуускайга номнуо тутуллан эрэллэр. Ол курдук, Сайсарыга Бекетов уулуссаҕа уонна Борисовка-1 диэки 78, 112 кыбаарталга тутуу бара турар. Ол эбийиэктэри бэҕэһээ муус устар 24 күнүгэр ОДьКХ ситимин саҥардарга үлэлэһэр пуонда, госкорпорация салайааччыта Константин Цицин, СӨ Бырабыыталыстыбатын бэрэссэдээтэлэ Владимир Солодов, Дьокуускай баһылыга Сардаана Авксентьева кэрийэн көрдүлэр.

«Бу оройуоннары биир кэлим тутуу Сахабыт сиригэр куорат эйгэтин тупсарарга төһүү күүс буолуо. «СӨ дьон олороругар сөбө суох эргэ дьиэлэри көтүрүү» эрэгийиэннээҕи бырайыак чэрчитинэн, өрөспүүбүлүкэҕэ 60 тыһыынчаттан тахса киһи толору хааччыллыылаах саҥа дьиэҕэ көһүөхтэрэ», — диэтэ Владимир Солодов.

Эрэгийиэннээҕи бырайыак үлэҕэ киирбитин туоһулуур капсуланы 112 кыбаарталга өрө көтөҕүллүүлээх быһыыга-майгыга бетон эркиҥҥэ уктулар.

«СӨ Бырабыыталыстыбатын кытта хаарбах дьиэттэн дьону көһөрүүгэ бииргэ үлэлэһэрбит туоһутунан саҥа дьиэлэр, бүтүн кыбаартал тутуллуо, дьон олоҕун таһыма тупсуо», — диэн бэлиэтээтэ Константин Цицин.

Саҥа кыбаарталларга оҕо саада, оонньуур былаһаакката баар буолуо. Быйыл алтынньыга бастакы дьиэлэр тутуллан номнуо киириэхтэрэ, хаарбах дьиэттэн көспүт ыаллар саҥа дьиэлэрин күлүүһүн аны күһүн үөрэ-көтө ылалларын туһугар тутааччылар тигинэччи үлэлии сылдьаллар.

Марианна Тыртыкова, «Саха сирэ», edersaas.ru

+1
0
+1
0
+1
0
+1
0
+1
0
+1
0
+1
0