Хаалыктаах хаамааччылар квескэ кытыннылар
Олох-дьаһах

Хаалыктаах хаамааччылар квескэ кытыннылар

Дьокуускай куорат төрөөбүт күнүгэр, болҕомтону тардыбыт хаалыктаах хаамыыга анаан, туристическай квест тэрилиннэ. 

Бу бырайыак ис уонна тас туризмы сайыннарарга, болҕомтону тардарга сыаллаах-соруктаах ыытылынна диэн Дьокуускай куорат уопсастыбаннаһы уонна иһитиннэрэр-биллэрэр маассабай сириэстибэлэри кытары үлэҕэ Департамена иһитиннэрэр.

Куорат күнүгэр ыытыллыбыт тэрээһиҥҥэ уопсайа 387 киһи кыттыбыт. Кинилэр уон хамаанданан арахсан, кинилэргэ анаан эрдэттэн былааннаныллыбыт суолларынан хаампыттар, google-картаҕа Дьокуускай 20 саҥа туристическай эбийиэгин киллэрбиттэр. Социальнай ситимнэргэ санааларын үллэстибиттэр.

Бэлэмнэниллибит суолларынан хаамыыга Москваттан кэлбит ыалдьыттар, монокуораттар.рф пуонда вице-бэрэсидьиэнэ Наталья Ибрагимова, пуонда салайар дириэктэрэ Ирина Ремнева, бырайыактыыр офис ыстаарсай менеджерэ Валентина Яковлева кыттыбыттар. Кинилэр бу хаамыыларыгар Атласовтар уһаайбалара, «Ирбэт тоҥ саарыстыбата» туристическай комплекс, «Чочур мыраан» этнографическай комплекс киллэриллибиттэр.

Наталья Ибрагимова бу бэлиэтэниллибит суолларынан сылдьыыларын: «Бу улахан суолга айан! Туристическай эбийиэктэр улахан болҕомтоҕо ылылыннылар. Аны социальнай, доруобуйа харыстабылын тутууларын каарта оҥорон киллэрэр буоллар, дьоҥҥо табыгастаах буолуох эбит  дии санаатым» диэн суруйбут.

Квест түмүгүнэн ыытыллыбыт уопсай мунньахха хамаандалар айаннарын туһунан билиһиннэрбиттэр, хас биирдии хамаанда хамандыырыгар Дьокуускай куорат дьаһалтатын аатыттан махтал суруктар туттарыллыбыттар.

Этиллибитин курдук, хамаандалар бары тус-туһунан бэлиэтэниллибит суолларынан сылдьыбыттар.  Ол курдук, сорохтор, Кырдьаҕас куоратынан, Петр Бекетов пааматынньыгынан, сорох хамаандалар «Ирбэт тоҥ саарыстыбата» туристическай комплексынан, Кыайыы болуоссатынан, Өксөкүлээх Өлөксөй пааматынньыгынан, паарканан, «Туймаада» стадионунан, «Дохсун» спорт комплексынан, мамонт музейынан, авиация музейыгар, авиапортка тиийэ, Дьокуускайдааҕы духуобунай семинариянан, уо.д.а. элбэх сиринэн астына-дуоһуйа хаампыттар.

0
0

Сайт матырыйаалларын ааптар көҥүлэ суох ылар бобуллар.

Ваш e-mail не будет опубликован.

17 − шесть =