Иистэнэрин ааһан, икки кытаанах эрэсиимнээх холуонньаҕа — Табаҕатааҕы 7 №-дээххэ уонна Мохсоҕоллоохтооҕу 6 №-дээххэ — иис үлэтэ сайдан иһэр. Ону биһиэхэ, суруналыыстарга, РФ Накаастабылы толорор федеральнай сулууспатын Саха сиринээҕи управлениета анаан пресс-тур тэрийэн, илэ көрөр кыахтанныбыт. Бу иистэнэр сыахтарга барыта 40-ча киһи үлэлиир.
Биһиги тиийиибитигэр, Хаҥалас улууһун Мохсоҕоллоох сэлиэнньэтигэр баар хаайыы иистэнэр сыаҕар үлэ күөстүү оргуйа турара. Манна үлэлиир хаайыылаахтар аныгылыы оҥоһуулаах иис массыыналарыгар сакааска киирбит таҥастары тигэн имитэ олороллоро. Онтон аттынааҕы хоско технолог ыйыытынан-кэрдиитинэн, кырыйар-быһар үлэ бара турара.
Холуонньаларга тугу тигэллэрин туспа экспозиция быһыытынан көрдөрбүттэрэ, ол — сыттыктар, матараастар, суорҕаннар, кээнчэлэр, орон таҥастара, холуобунай-исполнительнай систиэмэ үлэһиттэрин формалара, буруйдарын боруостааччылар бэйэлэрин сайын уонна кыһын кэтэр таҥастара.
Маныаха сыттыктарга, матараастарга уонна суорҕаннарга синтепон, холофайбер уонна боролуон курдук аныгы эрэ матырыйааллары тутталлар эбит. Ол санитарнай-гигиеническэй ирдэбиллэргэ эппиэттиирин ааһан, бары бородууксуйа сертифицикациялаах. Лицензияны Россия Накаастабылы толорор федеральнай сулууспатыттан өссө 2014 сыллаахха ылбыттар.
Маны таһынан, буруйдарын боруостааччылар араас идэлэр (холобура, медицина, коммунальнай хаһаайыстыба, суол-иис уо.д.а) үлэһиттэрин анал формаларын, бултааһыҥҥа, балыктааһыҥҥа анаммыт таҥастары, утуйар мөһөөчүктэри, бэл диэтэр, түүлээхтэн таҥастары эмиэ тигэллэр. Бу бородууксуйаларын, оҥоһуктарын дьаарбаҥкаларга, быыстапкаларга батараллар эбит.
Накаастабылы толорор управление хаайыылаахтар дьарыктаах буолууларын тэрийиигэ салаатын начальнига Алексей Мальцев бэлиэтииринэн, быйыл саҥа, аныгылыы оҥоһуулаах оборудованиелары атыыласпыттар, иистэнэр сыахтары өрө тардар өрөмүөннэри ыыппыттар, эбии иистэнэр массыыналары, остуоллары туруорбуттар. Итинэн, биллэн турар, үлэлиир усулуобуйаны тупсарбыттар, оҥорон таһаарар бородууксуйаларын көрүҥэ кэҥээбит.
Сакаастары улахан тэрилтэлэр (холобура, «Водоканал», «Сахабулт» уо.д.а), чааһынай да тэрилтэлэр, биирдиилээн дьон эмиэ биэрэллэр. Маныаха Накаастабылы толорор биэдэмистибэ саҥа дьыалабыай партнердары көрдөөһүҥҥэ үлэтин салгыы ыытарын биллэрэр. Сакаастары управлениеҕа биитэр бу холуонньаларга бэйэлэригэр тиийэн биэриэххэ сөп.
Барытын көрөн-истэн баран, тэрээһин бүтүүтүгэр, иистэнэ олорор саха уолаттарыгар тиийэн, кэпсэтэн ыллым. Кинилэр холуонньа училищетыгар үс ый үөрэнэн, иистэнньэҥ специальноһын ылбыттарын, хамнастарын кэмигэр ылалларын (счеттарыгар киирэр), үлэлииллэрэ бэйэлэригэр туһалааҕын эттилэр. Оннуга чуолкай: бастатан туран, буруйдарын боруостуур кэмнэригэр хас да специальноһы, идэни ылыахтарын сөп, онтулара босхолонон таҕыстахтарына, үлэ булалларыгар көмөлөһүөхтээх. Уонна саамай сүрүнэ — суут уурааҕынан эмсэҕэлээбиттэргэ моральнай, материальнай хоромньуларын төлүөхтээхтэр буоллаҕа.
Вера Макарова, «Саха сирэ» хаһыат, edersaas.ru
Хаартыскалар: РФ Накаастабылы толорор федеральнай сулууспатын Саха сиринээҕи управлениетын пресс-сулууспата.