Ааспыт өрөбүллэргэ Дьокуускай куорат 1 №-дээх кытаанах эрэсиимнээх холуонньатын оперативниктара 8 киһини туттулар. Бу дьон бобуулаах маллары хаайыы олбуорун көҥүө бырахпыттар.
Ол курдук, муус устар 21 күнүгэр 23.50 мүн. холуонньа сүрүн олбуорун нөҥүө бобуулаах маллары бырахпыт киһини туппуттар. Киниттэн 0,5 л арыгыны, 2 суотабай төлөпүөнү уонна ииттэрэр тэриллэри булан былдьаабыттар.
Ити тутар кэмнэригэр тутуллубут киһи куомуннааҕа «Ниссан» массыынатыгар олорон, муҥ кыраайынан айаннаан куотан истэҕинэ, ДПС уонна УФСИН сотрудниктара туппуттар.
Онтон муус устар 22 күнүгэр, түүн 00.48 мүн. өссө 6 киһини туппуттар. Эмиэ бобуулаах маллары киллэрэ сатаабыттар: 2,5 л арыгыны уонна 1,5 киилэ доруоһаны.
Медицинскэй туоһулааһын быһаарбытынан, бары арыгы испит туруктаахтар эбит.
Ону ааһан, икки киһи урут бу хаайыыга олоро сылдьыбыт.
Тутуллубут дьоҥҥо ахсыаннарыгар административнай боротокуол толоруллан, дьыала матырыйааллара мировой суут көрүүтүгэр барбыттар.
Бу туһунан РФ Накаастабылы толорор федеральнай сулууспатын Саха сиринээҕи управлениетын пресс-сулууспата иһитиннэрдэ.
Санатар буоллахха, маннык дьайыылары оҥорбут киһи РФ Административнай кодексатын 19.12-с ыстатыйатынан эппиэккэ тардыллар. Бу ыстатыйанан буруйдаммыт киһи 3 тыһ. солк. — 5 тыһ. солк. суумалаах ыстараап төлүүр.
Биһиги корр., «Саха сирэ» хаһыат, edersaas.ru
Хаартыскалар: РФ Накаастабылы толорор федеральнай сулууспатын Саха сиринээҕи управлениетын пресс-сулууспата.