Буруйдарын боруостаан олорооччуларга бобуулаах маллары, ол эбэтэр, суотабай төлөпүөнү, итирдэр утаҕы, харчыны, наркотигы уо.д.а. киллэрэ-тиэрдэ сатааһын хам-түм тахсар.
РФ Накаастабылы толорор федеральнай сулууспатын Саха сиринээҕи управлениетын пресс-сулууспата иһитиннэрбитинэн, Дьокуускай куораттааҕы 1 №-дээх кытаанах эрэсиимнээх холуонньа олбуорун нөҥүө кимнээх эрэ итирдэр утахтаах сэттэ пластиковай бытыылканы уонна биэс суотабай төлөпүөн, ииттэрэр тэрил, төлөпүөн аккумулятора сууламмыт бакыаттарын бырахпыттар. Бобуулаах маллары итинник быраҕыыны «перебросы» диэн ааттыыллар.
Холуонньа харабыллара ону кэмигэр өйдөөн көрөн булбуттар. Ол эрэн, бобуулааҕы бырахпыт дьон массыыналарыгар олороот элээрдэ турбуттарынан, кыайан туппатахтар.
Санатар буоллахха, маннык дьайыылары оҥорбут киһи РФ Административнай кодексатын 19.12-с ыстатыйатынан эппиэккэ тардыллар. Бу ыстатыйанан буруйдаммыт киһи 3 тыһ. солк. — 5 тыһ. солк. суумалаах ыстараап төлүүр.
Биһиги корр., «Саха сирэ» хаһыат, edersaas.ru
Хаартыска: РФ Накаастабылы толорор федеральнай сулууспатын Саха сиринээҕи управлениетын пресс-сулууспата.