Хааччахтанан олорууттан хаайтарбакка
Олох-дьаһах

Хааччахтанан олорууттан хаайтарбакка

Коронавирус дьаҥа туран, төһө да дьиэҕэ хааччахтанан олорбуппут иһин,  куйаар ситиминэн араас күрэстэр ыытыллаллар. Билэр-көрөр дьоҕуру сайыннарарга маннык оонньуулар, күрэстэр эмиэ туһалаахтар.

Горнай улууһун Атамай нэһилиэгин олохтоохторо биир дойдулаахтарынан,  Мотрена  Филиппованан киэн тутталлар, кини ситиһиититтэн үөрэллэр. Нэһилиэк баһылыгын солбуйааччы Алла Павлова:

Биһиги Мотренабыт оҕолоругар билиини-көрүүнү иҥэрэргэ дьулуһар. Нэһилиэккэ, улууска ыытыллар тэрээһиннэргэ куруук көхтөөхтүк кыттар. Ырыа, хоһоон суруйар. Оттон харантыын кэмигэр, улууска, өрөспүүбүлүкэҕэ уонна Арассыыйа куораттарыгар куйаар ситиминэн ыытыллыбыт күрэстэргэ, викториналарга кыттан, кыайыы бөҕө буолла. Биһиги онтон наһаа үөрдүбүт. Үчүгэй сонун, көр, санааны наһаа көтөҕөр уонна киһиэхэ эрчими биэрэр, — диир Алла Филипповна.

Ол курдук, Мотрена Владимировна муус устар ыйга Булуҥ улууһун Күһүүр модельнай бибилэтиэкэтэ «Сахалыы кинигэлэри таай»  диэн  анаграмматыгар, Бэрдьигэстээххэ  П.Аввакумов аатынан киин бибилэтиэкэ «Саха сирин историяҕа киирбит дьоно» онлайн-викторинатыгар, «Үлэ күүһэ» хаһыат Кыайыы 75 сылыгар 75 ыйытыылаах «Хорсун быһыыгыт — көлүөнэлэр сүрэхтэригэр» улуустааҕы кэтэхтэн викторинатыгар, Кэбээйи улууһун Чагда нэһилиэгэ Дьиэ кэргэн күнүгэр аналлаах онлайн-викторинатыгар 1 миэстэлэри ылаттаабыт.

Ыам ыйыгар Мытаахтааҕы модельнай бибилэтиэкэ  «Дьиэ кэргэн — олох төрдө» онлайн-викторинатыгар — 4, П.Аввакумов аатынан Бэрдьигэстээхтээҕи киин бибилэтиэкэ «Дьиэ кэргэн — дьол уйата» диэн улуустааҕы онлайн-викторинатыгар,  Кировскайдааҕы модельнай бибилэтиэкэ «Дьиэ кэргэн» куйаар ситиминэн ыыппыт викторинатыгар,  Хаҥалас улууһун Улахан Аан модельнай бибилэтиэкэтэ «Ньургуһун ырыата» кэтэхтэн викторинатыгар,  Мэҥэ Хаҥалас улууһун Тиэлиги нэһилиэгэ ыыппыт «Литературные родственники» викторинатыгар, Казань куорат Б.Урманче аатынан бибилэтиэкэ худуоһунньук,  скульптор, график Баки Урманчеҕа аналлаах викторинатыгар,  Мэҥэ Хаҥалас Балыктаах нэһилиэгэ ыыппыт «Өс хоһооннорун таай» күрэһигэр эмиэ 1 миэстэлэри ылаттаабыт.

Мотрена бэйэтэ: «Бу кыттарбар, маннык таайарбар, интэриниэт, мунньубут дьиэтээҕи бибилэтиэкэм көмөлөстүлэр. Ааҕарбын, кроссворду, толкуйдатар араас оонньуулары таайарбын, билиини-көрүүнү тургутар оонньууларга кыттарбын наһаа сөбүлүүбүн. Оҕолорум билии-көрүү аартыгын дабайалларыгар тирэх буоларга кыһаллабын«, — диэн хоруйдаабыт.

«Саха сирэ» хаһыат, edersaas.ru  саайтыгар анаан Алла Павлова,

Атамай, Горнай

3
0

Сайт матырыйаалларын ааптар көҥүлэ суох ылар бобуллар.

Ваш e-mail не будет опубликован.

8 + 16 =