Хаҥаласка Дойдуга бэриниилээх буолуу сылын хапсаҕайга чемпионатынан астылар...
Дьулуур - Олох-дьаһах

Хаҥаласка Дойдуга бэриниилээх буолуу сылын хапсаҕайга чемпионатынан астылар

Тохсунньу 17-19 күннэригэр Покровскайга спорт дыбарыаһыгар НХЗ GROUP бирииһигэр хапсаҕайга биирдиилээн уонна хамаанданан киирсиигэ чемпионат үһүс төгүлүн ыытылынна. Быйыл Хапсаҕай чемпионатыгар Хаҥалас улууһун бары нэһилиэктэриттэн спортсменнар биир киһи курдук кэлэн кыттыбыттара хайҕаллаах. Барыта 228 спортсмен үс категориянан — бэтэрээннэргэ, улахан дьоҥҥо, саҥа тахсан эрэр дьоҥҥо – күөн көрүстэ.

edersaas.ru

Олус тыҥааһыннаах киирсиилэр көрөөччүлэргэ спорт бырааһынньыгын бэлэхтээтилэр. Чемпионат биир сүрүн сыалынан дьону дойдуга таптал, бэриниилээх буолуу тула түмэр. Тустууктар тус бэйэлэрин эрэ туһугар буолбакка, нэһилиэктэрин чиэһин иһин туруналлар. Быйыл нөмүгүлэр ордук бэлэмнээх буолан, төрөөбүт-үөскээбит нэһилиэктэригэр анал Кубогу уонна 150 тыһыынча суумалаах сэртипикээти аҕаллылар.
Хаҥалас Хапсаҕай Федерациятын 2019 с түмүгүнэн, бастыҥ спортсмен аатын Владислав Ефимов сүгэн, 100 тыһыынчалаах сэртипикээтинэн наҕараадаланна.
Улууһугар спорт сайдарын туһугар кыһаллан бу курдук улахан чемпионаты тэрийээччи НХЗ GROUP генеральнай дириэктэрэ, Хаҥалас улууһун Хапсаҕайга Федерациятын президенэ Вячеслав Нестеров чемпионакка кыттыбыт спортсменнар таһымнара үрдээбитин астынан туран бэлиэтиир. “Ил Дархаммыт Айсен Сергеевич Николаев быйылгы сылы Дойдуга бэриниилээх буолуу сылынан биллэрбитэ биһиги чемпионнаппыт сыалыгар-соругар толору эппиэттиир. Чемпионаты өрөспүүбүлүкэ спортка, физическай культураҕа министиэристибэтин, улуус дьаһалтатын, спортка управлениетын уонна туох баар нэһилиэктэр баһылыктарын кытта биир санаанан, биир түмсүүнэн тэрийдибит. Кыттыбыт дьон, ыалдьыттар бары астыммыттарын биллэрдилэр. Ол биһиги үлэбит тутаах сыанабыла буолар”, — диир Вячеслав Нестеров.

“Чемпионат тэрээһинин таһыма сылтан сыл үрдээн иһэр. Улууспут нэһилиэктэрин спорстменнара кыттан, норуот түмсүүтүн күүһүн көрдөрдүлэр. Биһиги улууска хапсаҕайы тарҕата, сайыннара сылдьар киһибитигэр, чемпионат тэрийээччитигэр Вячеслав Нестеровка махталбытын биллэрэбит. Кэлиҥҥи кэмҥэ хапсаҕайынан дьарыктанааччы ыччат ахсаана эбиллэн иһэрэ үөрдэр”, — диэн бэлиэтиир Хаҥалас улууһун спортка управлениетын начаалынньыга Юрий Никифоров.
Быйылгы хапсаҕайга ыарахан ыйааһыннаахтарга абсолютнай чемпионунан Данил Иванов буолла. Орто ыйааһыҥҥа —  Дьулустаан Булатов.
Дойдуга бэриниилээх буолуу сылын Хаҥалас улууһа бу курдук нэһилиэктэри спорт тула түмэн, хапсаҕайга чемпионат ыытан көрүстэ.

 

“Саха сирэ” хаһыакка, edersaas.ru cайтка анаан Айталина ШАДРИНА.

2
0

Сайт матырыйаалларын ааптар көҥүлэ суох ылар бобуллар.

Ваш e-mail не будет опубликован.

20 + 16 =