“Хаҥалас хапсаҕайа” түһүлгэ муҥутуур кыайыылааҕынан Иван Сергеев буолла

Хаҥалас баһылыгын уонна улуус нэһилиэктэрин баһылыктарын бирииһигэр “Хаҥалас хапсаҕайа” турнир былааҕа быйыл уон иккис төгүлүн көтөҕүллэн, сүүрбэ түөрт улуустан 273 бөҕөһү, ол иһигэр 63 спорт маастарын Покровскай түһүлгэтигэр муста.

edersaas.ru

Бэтэрээннэр ортолоругар Николай Иванов (70 кг) уонна  2017 сыл сайыныттан хотторуу хомолтотун билэ илик Александр Румин (90 кг үөһэ) бу да сырыыга тэҥнээхтэрин булбатылар, аҥаардастыы аатырдылар.

90 киилэҕэ диэри ыйааһыҥҥа биллиилээх хапсаҕайдьыт Григорий Массаев кыайыы көтөллөннө. Быйылгыттан бэтэрээннэргэ тахсан тустар Прокопий Петров (80 кг) дьиэтээҕи түһүлгэтигэр бэһис кыһыл көмүс мэтээлин ылары ситистэ. Оттон 60 киилэлээхтэргэ уон үс бөҕөс күрэс былдьаспытыттан Клим Наумов бастыҥынан буолла.

Эр дьоҥҥо, көһүтүллүбүтүн курдук, төрүт оонньууну сэҥээрээччилэр тыҥааһыннаах хапсыһыылары дуоһуйа көрдүлэр. Манна 64 хапсаҕайдьыт, ол иһигэр 14 спорт маастара иэмэх мастыы эрийсибит 70 киилэҕэ диэри ыйааһыҥҥа Үөһээ Бүлүүттэн Рустам Прокопьев кыайыылаах таҕыста уонна Боотулуутугар алтыс кыһыл көмүс мэтээлин илдьэ барда.

Чэпчэки ыйааһыҥҥа Улахан Аан 37 саастаах хардааччыта Илья Тимофеев билигин да баардааҕын көрдөрөн көрөөччүлэрин үөртэ, пьедестал үрдүкү үктэлин дабайан, 2006, 2008, 2011 сыллардааҕы ситиһиилэрин хатылаата.

62 киилэлээхтэргэ Егор Иванов кыайыылааҕынан буолла. Оттон 80 уонна 90 киилэҕэ диэри ыйааһыннарга Олег Чернов, Игорь Софронеев өрөспүүбүлүкэ чөмпүйүөнүн аатын мээнэҕэ сүкпэттэрин итэҕэттилэр. Ыарахан ыйааһыҥҥа Увар Тимофеевтыын тэҥҥэ туруулаһыах бөҕөс көстүбэтэ.

Тэрийээччилэр быйыл муҥутуур кыайыылааҕы быһаарар хапсыһыыга 70 киилэҕэ диэри ыйааһыннаахтары кытыннардылар. Манна отучча бөҕөс күрэстэспититтэн, түмүк киирсиигэ Чурапчы чулуутун Владимир Афанасьевы бүдүрүппүт Үөһээ Бүлүүттэн төрүттээх Чурапчытааҕы институт 19 саастаах устудьуона Иван Сергеев кыайыылааҕынан таҕыста. Манна даҕатан эттэххэ, Иван ыйааһыныгар үһүс миэстэнэн дуоһуйарга күһэллибитэ. Кыайыылаах “Хаҥалас хапсаҕайын” үтүө үгэһинэн бэдэр тириитинэн уонна 100 000 солкубайынан биһирэннэ.

 «Хаҥалас хапсаҕайа-2019» турнир кыайыылаахтара уонна призердара

Олунньу 1-3 күннэрэ, Покровскай

Бэтэрээннэргэ

60 кг: 1. Клим Наумов (Сунтаар), 2. Дмитрий Монастырев (Чурапчы), 3. Александр Протопопов (Нам)

70 кг: Николай Иванов (Таатта), 2. Евгений Ким (Үөһээ Бүлүү), 3. Айаал Павлов (Чурапчы)

80 кг: 1. Прокопий Петров (Хаҥалас), 2. Иван Сильвестров (Мэҥэ Хаҥалас), 3. Алексей Соловьев (Дьокуускай)

90 кг: 1. Григорий Массаев (Таатта), 2. Айал Иванов (Сунтаар), 3. Станислав Афанасьев (Дьокуускай)

90 кг үөһэ: 1. Александр Румин (Нам), 2. Василий Афанасьев (Ньурба), 3. Лев Афанасьев (Дьокуускай)

Эр дьоҥҥо

55 кг: 1. Илья Тимофеев (Хаҥалас), 2. Айал Лыткин (Мэҥэ Хаҥалас), 3. Прокопий Григорьев (Кэбээйи)

62 кг: 1. Егор Иванов (Үөһээ Бүлүү), 2. Егор Потапов (Дьокуускай), 3. Иван Сергеев (Үөһээ Бүлүү — ЧИФКиС)

70 кг: 1. Рустам Прокопьев (Үөһээ Бүлүү), 2. Иван Семенов (Кэбээйи -ЧИФКиС), 3. Александр Алексеев (Хаҥалас)

80 кг: 1. Олег Чернов (Томпо), 2. Давыд Колесов (Таатта), 3. Роберт Сидоров (Дьааҥы)

90 кг: 1. Игорь Софронеев (Нам), 2. Пантелеймон Наумов (Сунтаар), Павел Дорофеев (Сунтаар).

120 кг үөһэ: 1. Увар Тимофеев (Үөһээ Бүлүү), 2. Гаврил Михайлов (Сунтаар), Дьулустаан Андреев (Ньурба).

Роман Попов, edersaas.ru

Хаартыска Интэриниэттэн ылылынна.