САХАЛЫЫ ГОРОСКОП (Ахсынньы 17-23 күннэрэ)

Бөлөххө киир:

Хой. Бу нэдиэлэҕэ хой бэлиэлээхтэр үөрэнэргитигэр, бэйэҕитин атын эйгэҕэ холонон көрөргүтүгэр табыгастаах буолуоҕа. Тус олоххутун умнумаҥ, чугас киһигитин сибидээнньэҕэ ыҥырыҥ, кэпсэтиҥ. Саҥа дьыллааҕы харыйаҕытын туруора илик дьон туруорарга тиэтэйиҥ – бэртээхэй настарыанньа бэлэм!

Оҕус. Сөпкө аһыырга уонна спордунан дьарыктанарга сөптөөх нэдиэлэ үүммүт. Дьарыккыт түмүктэри аҕалыаҕа, дьарыктанартан астыныаххыт, дуоһуйуоххут диэн сулустары билгэлээччилэр кэпсииллэр. Үлэҕитигэр, үөрэххитигэр кыһаллыҥ – ситиһии кэмэ.

Игирэлэр. Бу нэдиэлэҕэ уурбуккут, туппуккут, ылсыбыккыт барыта табыллыаҕа. Ол эрээри элбэҕи саҥарымаҥ, дьону өһүргэтиэххитин сөп. Тус олоххутугар туох да уларыйыы суох, арай, доруобуйаҕытын көрүнүҥ. Экстремальнай спордунан, киһи олоҕор кутталы суоһуурунан дьарыктанымаҥ, сэрэхтээх буолуҥ.

Араак. Үгүс хоһу саҥаран доҕотторгутун, дьиэлээхтэргитин өһүргэтиэххитин сөп. Нэдиэлэ бүтүүтэ сынньаныҥ: эрэстэрээҥҥэ, тыйаатырга, аймахтаргытыгар сылдьыҥ. Элбэҕи былааннааҥ, ыраланыҥ – туолуоҕа диэн сулустар кэпсииллэр.

Хахай. Дьиэҕитигэр-уоккутугар чуумпу кэм, манан сынньанан, уоскуйан хаалыҥ. Саҥа дьыл саҕана түбүгүрүү онто суох баар буолуоҕа. Кирэдьиит ыларга, ону сөптөөхтүк туһанарга тоҕоостоох кэм. Сибиэһэй салгыҥҥа сылдьыҥ, доруобуйаҕыт тупсуоҕа.

Кыыс. Икки аҥаардарын көрсө илик кыыс бэлиэлээхтэр өрөйүҥ, чөрөйүҥ! Кими эрэ күүппүккүт, көрдөөбүккүт олоххут тухары аттыгытыгар сылдьыбыт буолуон сөп, өйдөөн көрүҥ. Олоххутугар улахан уларыйыылары киллэрэртэн куттанымаҥ – барыта табыллыаҕа.

Ыйааһын. Доруобуйаҕыт бөҕөргүө, тупсуо. Нэдиэлэ бастакы аҥаарыгар тапталга сууланыаххыт, барыта табыллан иһиэҕэ. Иккис аҥаарыгар түбүгүрүөххүт, ол эрээри бу барыта үчүгэйгэ эрэ буолбутун кэлин өйдүөххүт. Өрөбүллэргэ сынньаныҥ — тыйаатырга, киинэҕэ сылдьыҥ. Мантан элбэҕи билиэххит-көрүөххүт диэн сулустар сүбэлииллэр.

Скорпион. Дуоһунаскыт үрдүүрүгэр, билиигит-көрүүгүт элбииригэр бу нэдиэлэҕэ туох да харгыһы көрсүөххүт суоҕа – барыта баҕарбыккыт курдук табыллан иһиэҕэ. Нэдиэлэ иккис аҥаарыгар сөбүлэһии түһэрсэргэ, дуогабар баттаһарга табыгастаах күннэр күүтэллэр эбит.

Охчут. Күннээҕи олохтон-дьаһахтан аралдьыйа түһүҥ, сынньаныҥ. Саҥа дьону кытта билсии, ыраах айан суола күүтэр. Үлэҕитигэр, үөрэххитигэр сыһыаннаах былааннары толкуйдуу, торумнуу сылдьыҥ. Сыл бүтүүтэ, баҕар, ситиһии кэлиэҕэ, ол түгэни мүччү тутумуоххутун наада, болҕомтолоох буолуҥ.

Чубуку. Нэдиэлэ бастакы аҥаарыгар “чубукулар” ситиһиилээх буолуоххут. Тус бэйэҕит олоххутугар эмиэ үчүгэй уларыйыылар буолуохтара. Дьону-сэргэни кытары түргэнник өйдөһүөххүт. Доруобуйаҕытын чэбдигирдиннэххитинэ, кэлин бэйэҕит бэйэҕитигэр махтаныаххыт.

Күрүлгэн. Олоххут биир долгунунан устарыттан сылайбыт буоллаххытына саҥаны, уратыны киллэрэртэн куттанымаҥ. Саҥаны боруобалыырга, кэлэргэ-барарга, үөрэргэ-көтөргө хаһан даҕаны хойут буолбатах. Аны бу нэдиэлэҕэ тапталга табыллыы күүтэр. Соҕотох сылдьар дьон сүрэхтэрин аҥаарын көрсүөхтэрин сөп диэн сулустар кэпсииллэр.

Балыктар. Бу нэдиэлэ уустук, ол эрээри инники олоххутугар элбэҕи быһаарыаҕа. Олус элбэх үлэ күүтэр, сыраҕытын барыаххыт. Буоллун, кыһаллан, барытыгар ылсан иһиҥ. Кэлин бэйэҕит бэйэҕитигэр махтаныаххыт. Сотору кэминэн барыта оннугар түһүө, этэҥҥэ буолуо.

edersaas.ru

+1
0
+1
0
+1
0
+1
0
+1
0
+1
0
+1
0