Дьиэ кэргэн күнүгэр анаан биир кэмнээх эрэ буолбакка, Горнай улууһун дьаһалтата сылы эргиччи улуус олохтоохторугар араас хайысхалаах өйөбүлү оҥорор.
edersaas.ru
Бу туһунан улуустааҕы дьаһалта социальнай бэлиитикэ салаатын салайааччыта Ксения Васильева маннык кэпсиир:
— 2019 сылтан улуус баһылыгын уурааҕынан төрдүс уонна алтыс оҕотун оҕоломмут ыалларга сүөһүнэн өйөбүл оҥоһуллар.
Ол курдук, уопсайа 11 дьиэ кэргэҥҥҥэ көмө быһыытынан ньирэй бэриллиннэ. 2020 сылга маннык муниципальнай өйөбүлүнэн 19 ыал туһаныаҕа.
2019-2020 үөрэх сылларыгар оҕону оскуола сааһыттан ыал буоларга бэлэмнээн иитэр сыалтан, Л.Н. Харитонов аатынан Маҕарас орто оскуолата «Дьиэ кэргэн азбуката» бырагырааманан 10 кылаас оҕолорун үөрэтиини саҕалаата. Күһүҥҥүттэн бары оскуолалар маннык үөрэҕи саҕалыахтара.
Психологическай киин улуустааҕы филиала «Дьиэ кэргэн модела» диэн бырагырааманан үлэлиир. Дьиэ кэргэн, ийэ-аҕа, оҕону иитии хайысхаларыгар нэһилиэнньэ болҕомтотун тардар сыалтан, анал бырайыак күрэҕэ ыытылынна. Онно кыайбыт 5 бастыҥ бырайыакка 30 000 солк. субсидия бэрилиннэ.
Быйыл «Эдэр дьиэ кэргэттэри дьиэнэн хааччыйыы” хос бырагырааманан — 7 ыал, Тыа хаһаайыстыбатын салаатынан олорор дьиэнэн хааччыйыы бырагырааманан — биир ыал дьиэ тутталларыгар субсидиянан туһаннылар.
2012 сылтан элбэх оҕолоох дьиэ кэргэннэргэ 494 босхо сир учаастага бэрилиннэ.
… Ити курдук, улуус салалтата ыал уйгулаах олоҕо бигэ туруктаах буоларын туһугар араас өйбүлү оҥорор.
Елена ПОТОЦКАЯ, «Саха сирэ» хаһыат, edersaas.ru
Хаартыска – Ксения Васильева тиксэриитэ.