Коронавирус туран, дойдуга улахан долгуйуу таҕыста.
Хомойуох иһин, Саха сирин бу дьаҥ алҕас да ааһа барбата. Онон ыарыыттан дьону-сэргэни, оҕону-урууну харыстыыр араас дьаһаллар ылыллаллар. Горнайга улуус баһылыга Н.В.Андреев дьаһалынан волонтердар ыстааптара тэриллэн, үлэ тиһиктээхтик ыытыллар.
Волонтердар дьиэҕэ хааччахтанан олорор аҕам саастаахтарга, соҕотох олорор дьоҥҥо аһы-үөлү, эми-тому, ол-бу наадалаах маллары дьиэлэригэр илдьэн биэрэллэр. Ону таһынан, кырдьаҕастарга мас хайыталлар, саһаанныыллар, хаар күрдьэллэр, муус киллэрэллэр, мааскалары тигэн тарҕаталлар, о.д.а. оҥорор көмөлөрө элбэх. Нэһилиэктэр үлэлэрин күн ахсын ыстаапка отчуоттууллар.
Биллэрбиттэринэн, улуустарыгар билигин уопсайа 54 волонтердаахтар.
Сүрүн ыстаабы улууска ыччат бэлиитикэтин отделын исписэлииһэ С.Туралысова салайар.
Атамайга Д.Филиппов, Бэрдьигэстээххэ Я.Петров, Кировка Д.Леонтьева, Маҕаныга А.Максимова, Маалтааныга А.Григорьева, Мытаахха А.Тимофеева, Одунуга М.Данилова, Октябрьскайга С.Назаров, Солоҕоҥҥо И.Дьяконова, ыччат үлэтин бэйэлэрин нэһилиэктэригэр сүрүннүүр, салайар, дьаһалтаҕа үлэлиир эдэр дьон волонтердар этэрээттэрин сатабыллаахтык салайаллар. Аҕам саастаахтарга, кыһалҕалаахтарга көмөлөһөргө сибээһи тутан олороллор. Волонтердар икки күннээх үлэлэригэр уопсайа 22 сайаапка киирбит. Көхтөөх ыччат үлэтин өйөөн, сэттэ нэһилиэккэ, волонтердарга көмөҕө көлөлөр бэриллибиттэр.
Оттон аҕам саастаахтар ыччаттарыгар көмөлөрүн, өйөбүллэрин иһин махтаналлар.
Хаартыскалар: Горнай улууһун дьаһалтата