Горнай улууһа СӨ оскуола иннинээҕи үөрэхтээһин тэриллибитэ 100 сылыгар аналлаах кубогы тутта
Горнай улууһун үөрэҕин үлэһиттэрин Олунньутааҕы мунньаҕын иитинэн, СӨ оскуола иннинээҕи үөрэхтээһин тэриллибитэ 100 сылыгар аналлаах эстафета кубогын туттардылар. Тэрээһиҥҥэ Дьокуускай куорат үөрэҕин управлениетын начаалынньыга Алексей Семенов, оскуола иннинээҕи саастаах үөрэхтээһин кылаабынай исписэлииһэ Анна Шергина, Е.Г.Корнилова аатынан 51-с нүөмэрдээх уһуйаан сэбиэдиссэйэ Сардаана Захарова кытыннылар.
Тэрээһин үөрүүлээх чааһа Бэрдьигэстээх сэлиэнньэтигэр Семен, Софрон Даниловтар ааттарынан Духуобунас киинигэр буолла. Эстафета кубогын Горнай улууһун баһылыгын бастакы солбуйааччы Владимир Спиридонов, үөрэх управлениетын начаалынньыга Варвара Сметанина, оскуола иннинээҕи үөрэхтээһин кылаабынай исписэлииһэ Аина Егорова туттулар.
Дьокуускай куорат дэлэгээссийэтин бастакынан Маҕарас сэлиэнньэтин “Туллукчаана” уһуйаана көрүстэ. Бэрдьигэстээххэ дэлэгээссийэ инновационнай бырагыраамалар быыстапкаларын уонна оскуола иннинээҕи үөрэхтээһин тэрилтэлэрин, “Кырачаан ымыылар”, “Сардаана” оҕону сайыннарар кииннэр, 98 миэстэлээх соторутааҕыта үлэҕэ киирбит “Кэнчээри” оҕо саадын бырайыактарын көрдүлэр.
Эстафета иитинэн Горнай улууһун оскуола иннинээҕи үөрэхтээһинин тэрилтэлэригэр педагогтар, төрөппүттэр, уопсастыбаннас кыттыылаах сэминээрдэр, аһаҕас аан күннэрэ, быыстапкалар, маастар-кылаастар буоллулар. Хас биирдии уһуйааҥҥа педагогическай үлэ бэтэрээннэрэ кыттыылаах үөрүүлээх тэрээһиннэри ыыттылар.
Эстафета кубога сыл түмүктэниэр диэри бары улууһу таарыйыахтаах. Былаан быһыытынан, кубогы салгыы Бүлүү улууһа тутуохтаах.
СӨ Үөрэҕин уонна наукатын пресс-сулууспата.