Бүгүн, ыам ыйын 9 күнүгэр, Горнай улууһун баһылыга Никита Андреев сэрии бэтэрээнин Михаил Дьячковскайы, сэрии огдооболорун Улуу Кыайыы 75 сылынан онлайн форматынан эҕэрдэлээтэ, сэһэргэстэ.
—Ыам ыйын 9 күнэ Арассыыйа бары олохтоохторугар дириҥ өйдөбүллээх ытык күн. Улууска Аҕа дойду уоттаах сэриитин кыттыылааҕа Михаил Михайлович Дьячковскай Солоҕон нэһилиэгэр олорор, итиэннэ 76 тыыл бэтэрээнэ, 11 сэрии огдообото, 36 сэрии тулаайаҕа, 167 сэрии сылларын оҕолоро бааллар.
Ытык дьоммут, эһиги кырыктаах сэрии, уот кураан сылларыгар бэйэҕитин харыстаммакка үлэлээбиккитин үрдүктүк сыаналыыбыт. Сэрии, үлэ фроннарыгар көрдөрбүт хорсун, дьоруойдуу быһыыгытынан киэн туттабыт. Кэлэр ыччаккытыгар, биһиги көлүөнэҕэ, туруктаах олоҕу түстээбиккитигэр, дойдубут сайдыыга олоҕун бигэтик уурбуккутугар барҕа махталбытын тиэрдэбит. Эһиги иннигитигэр сүһүөхтээх бэйэбит сүгүрүйэбит, хоолдьуктаах бэйэбит хоҥкуйабыт.
Билигин үүнэр-сайдар көлүөнэҕэ кэс тылгытын тиэрдэргит, дьон-сэргэ ортотугар сылдьаргыт үтүө холобур буолар. Биһиги ытык иэспит ытык кырдьаҕастарбытыгар сүгүрүйүү, кинилэр хорсун быһыыларын үйэтитэн, кэлэр көлүөнэлэргэ тиэрдии. Сэрии сылларын ыар кырдьыга умнуллубатын туһугар туруулаһыы, сэриигэ өлбүт дьоруойдары кэриэстээһин.
Эһиэхэ, күндү дьоммут, чэгиэн доруобуйаны, уһун үйэни, ыраас эйэлээх халлааны, дьолу-соргуну, нус-бааччы олоҕу баҕарабыт! — диэн ис сүрэхтэн тыллан тахсар истиҥ эҕэрдэтин эттэ.
Өрөгөйдөөх Кыайыы күнүнэн ытык кырдьаҕастары кэнчээри ыччат улаханнык долгуйан туран эҕэрдэлээтэ.
«Көмүс далаһа» ырыа устуудьуйатын иитиллээччитэ Арина Герасимова «День Победы,» Наталья Егорова «Баллада о солдате» ырыаларынан, С.П.Данилов аатынан Бэрдьигэстээх орто оскуолатын үөрэнээччилэрэ хоһоонунан эҕэрдэлээтилэр.
«Саха сирэ» хаһыат, edersaas.ru саайтка анаан Айталина Санникова,
Горнай улууһа.
Ааптар хаартыскаларга түһэриитэ.