Дьокуускай куораттааҕы Медицина киинин терапияҕа 1 №-дээх отделениетын сэбиэдиссэйэ Марина Березовская Соҕурууҥу Кытайтан кэлэн иһэр «Гонконг гириибэ» Саха сиригэр тэнийэн эрэрин туһунан сурах оруна суоҕун, омуннааҕын туһунан бигэргэттэ.
Надежда ЕГОРОВА, «Саха сирэ» хаһыат, edersaas.ru
Ол курдук, Дьокуускайга «Гонконг гириибэ» бэлиэтэнэ илик. Бу сыстыганнаах ыарыы баара хаан анаалыһыттан биллэр. «Куоракка гириип өрө турда диэн этэр сыыһа, арай ОРЗ уонна ОРВИ ыалдьыбыт дьон ахсаана элбээтэ. «Гонконг гириибин» көннөрү гирииптэн араарар судургу. Киирдэҕинэ олус сытыытык биллэрэр, киһи температурата тахсар, харах ууланар. Ыарыһах кыайан турбат да буолуон сөп, бастакы икки-үс күннэргэ олус ыараханнык ыалдьар, этэ-сиинэ барыта «тостор» курдук буолар», – диэн Марина Семеновна быһаарда.
Марина Березовская оптуобустарга, дьон тоҕуоруһар сиригэр инфекцияны хаппат туһугар өссө күһүн быһыы ыларга сүбэлиир. Тоҕо диэтэххэ, ыарыыны сэрэтэр быһыыны эрдэ ыллахха, организм ыарыыны утары охсуһарга ситэри үөрэниэн наада. Үксүгэр наар үөрэ-көтө сылдьар дьон аҕыйахтык ыалдьар. Ыарыыны утары охсуһар күүһэ мөлтөх киһи сыстыганнаах ыарыыга түргэнник ылларар.
Оскуолалар харантыыҥҥа сабыллыыларын сүрүн төрүөтүнэн ыарыыны сэрэтии, тарҕаныытын бопсуу буолар. Билиҥҥи туругунан, куорат оскуолаларын үөрэнээччилэрн 10-30% гирииптээтэ.
«Вирус инфекциятын антибиотиктарынан эмтэниллибэт. Ыарыһах ханнык да эмтэри испитин иһин, кини аччаабыта 4-7 күн ыалдьар. Ыалдьыбыт киһи 3-4 күн устата ханна да барбакка дьиэтигэр сытан эмтэниэн наада. Сибиэһэй салгын тиийбэт хоһугар инфекция түргэнник тарҕанар уонна өр турар. Ыарыыны утары охсуһар күүс сүрүн өстөөҕө – салгытыллыбат хос уонна дьиэ», – диэн терапия сэбиэдиссэйэ Марина Березовская ыарыыттан хайдах харыстанарга сүбэлээтэ.
Надежда ЕГОРОВА, «Саха сирэ» хаһыат, edersaas.ru