Дьокуускай куорат федеральнай суутугар 30 саастаах киһиэхэ бириигэбэр тахсыбыт. Түөкүннээбитин иһин.
Суут быһаарбытынан, бу эдэр киһи «Вконтакте» социальнай ситимҥэ билэр дьахтарын аатынан страница арыйбыт. Уонна онно массыына ыытар быраабы ыларга көмөлөһөрүн, манньаҕа өҥө оҥорорун туһунан биллэрии таһаарбыт.
Биллэриини ааҕан, Тыва Өрөспүүбүлүкэтиттэн икки дьахтар суруйбут. Кинилэргэ бу киһи «ГИБДД иниспиэктэрэбин» диэн сымыйалаабыт.
Дьахталлар ону итэҕэйэн, массыына ыытар быраап дастабырыанньатын ылаары, кини баанын каартатыгар хас биирдиилэрэ 16 тыһ. солк. ыыппыттар. Ол эбэтэр, 32 тыһ. солк. суумалаах хоромньу оҥоһуллубут.
Суут кинини түөкүннээһиҥҥэ буруйдааҕынан билинэн, 2 сыл 6 ыйга кытаанах эрэсиимнээх холуонньаҕа көҥүлүн быһарга уурбут.
Бу туһунан СӨ Борокуратууратын пресс-сулууспата иһитиннэрдэ.
Биһиги корр., «Саха сирэ» хаһыат, edersaas.ru
Хаартыска: интэриниэттэн.