“Весна на НВК” бырааһынньыктааҕы аахсыйа чэрчитинэн, ааспыт өрөбүлгэ, муус устар 1 күнүгэр, “Саха” национальнай көрдөрөр-иһитиннэрэр хампаанньа быһа эфиригэр дуобакка аан дойду хас да төгүллээх чөмпүйүөнэ Сергей Белошеев уонна аан дойду уон биир төгүллээх чөмпүйүөнэ Гаврил Колесов икки ардыларыгар матч ыытылынна. Кыайыылааҕынан Сергей Белошеев тахсан, күрэстэһии сүрүн спонсора — Үүнэр көлүөнэ пуондата туруорбут 100 000 солкуобай бирииһинэн биһирэннэ.
Гроссмейстердар үс микроматчы – биирдиилэрэ 2 мүнүүтэ 3 сөкүүндэ уһуннаах алта партияны оонньоотулар. Икки бастакы микроматч тэҥнэһиинэн түмүктэннэ. Үһүс быһаарыылаах микроматч иккис партиятыгар Гаврил Колесов, бириэмэҕэ ыктаран, сыыһа хаамыыны оҥорон, хотторон кэбистэ.
Дуобакка Саха Өрөспүүбүлүкэтин сүрүн тириэньэрэ Александр Азаров бэлиэтээбитинэн, билигин дуобат сайтарыгар спорду сэҥээрээччилэр көхтөөх кыттыыларынан гроссмейстердар оонньууларын ырытыы, дьүүллэһии барар.
Санатан эттэххэ, былырыыҥҥы матчка Гаврил Колесов гроссмейстер Николай Стручкову хотон турар.
Роман ПОПОВ, “Саха сирэ” хаһыат, edersaas.ru
+1
+1
+1
+1
+1
+1
+1