УФСБ үлэһиттэрэ бүгүн СӨ Бырабыыталыстыбатын, итиэннэ Тырааныспар уонна суол хаһаайыстыбатын министиэристибэтигэр киирэн, докумуоннары дьэҥдьийдилэр. Ол туох-ханнык ис хоһооннооҕун СӨ Бырабыыталыстыбатын уонна Ил Дархан пресс-сулууспата маннык быһаарар:
2019 сыл муус устарыгар РФ Холуобунай кодексатын 290 ыстатыйатын 6 ч. Уус-Маайа улууһугар СӨ Массыына суолун управлениетын көрөр-истэр отдел начаалынньыгын урукку солбуйааччытын аатыгар улахан кээмэйдээх бэрик ылбытын иһин холуобунай дьыала көбүтүллүбүт.
От ыйын 10 күнүгэр ФСБ Управлениетын Саха сиринээҕи салаата СӨ Бырабыыталыстыбатын бастакы солбуйааччытын Алексей Колодезников хоһугар уонна СӨ Тырааныспар, суол-иис хаһаайыстыбатын министиэристибэтигэр киирэн, ити холуобунай дьыалаҕа сыһыаннаах докумуоннары ирдэспит.
2013 сыллаахха Алексей Колодезников ОДьКХ уонна энергетика миниистиринэн үлэлээбитэ. Онон ол кэмнээҕи докумуоннары дьэҥдьийбиттэр. Санатан эттэххэ, буруйданар киһи судаарыстыбаннай тэрилтэҕэ дуоһунастаах балаһыанньатынан туһанан, Уус-Маайа оройуонугар Югоренок-Солнечнай хайысхатынан суолу оҥорорго кэтэх урбаанньыттан 1 мөлүйүөн солкуобайы сыл ахсын төлүүрүн курдук кэпсэппит. Урбаанньыт ол усулуобуйаҕа сөбүлэһэн, 2013-2016 сылларга бааҥҥа баар счетуттан араас сууманы сыл ахсын ыыта олорбут. Буруйданар киһи уопсайа сокуоннайа суох 3 мөлүйүөн солкуобайы ылбыт.
«Саха сирэ», edersaas.ru