Руслан Федотов: «Сыллар-хонуктар ааһан истэхтэрин ахсын, Улуу Кыайыы күнүн суолтата өссө дириҥээн, кэҥээн иһэр»
Ытыктабыллаах Аҕа дойду Улуу сэриитин кыттыылаахтара, тыыл бэтэрээннэрэ, сэрии сылларын оҕолоро, өрөспүүбүлүкэбит олохтоохторо!
Эһигини барыгытын Улуу Кыайыы үбүлүөйдээх 75 сылын бэлиэтиир өрөгөйдөөх бырааһынньыгынан, ис сүрэхпиттэн долгуйан туран, итиитик-истиҥник эҕэрдэлиибин!
Ыам ыйын 9 күнэ – дойдубут устуоруйатыгар кыһыл көмүс буукубаларынан суруллубут ураты истиҥ, долгутуулаах, күүтүүлээх, умнуллубат сырдык бырааһынньык, үйэ саас-тухары киһи-аймах өйүттэн-сүрэҕиттэн хаһан да умнуллубат, сүппэт, симэлийбэт бэлиэ күн.
Аҕа дойду Улуу сэриитэ дойдубут бүттүүнүн, ол иһигэр биһиги өрөспүүбүлүкэбит хас биирдии улууһун, нэһилиэгин, түөлбэтин, дьиэ кэргэнин хаҕыстык, ыарыылаахтык хаарыйбыта… Аҕа дойду көмүскэлигэр 1418 хонук устата салҕанан барбыт сэриигэ Кыайыы туһугар элбэх омук дьоно биир дьиэ кэргэн курдук сомоҕолоһон фроҥҥа уонна тыылга бэйэлэрин хорсун быһыыларынан төрөөбүт дойдуга, норуокка бэриниилээх, ытыктабыллаах буолуу үтүө холобурун көрдөрбүттэрин умнубаппыт.
Сыллар-хонуктар ааһан истэхтэрин ахсын, Улуу Кыайыы күнүн суолтата өссө дириҥээн, кэҥээн иһэр. Бүгүн биһиги эйэлээх халлаан анныгар олороллорун туһугар олохторун кэрэйбэккэ турууласпыт аҕаларбыт, эһээлэрбит албан ааттарын үйэтитэр – барыбыт ытык иэспит.
Улуу Кыайыыны уһансан сэрии толоонугар олохторун толук уурбут хорсун-хоодуот буойуннарга, уоттаах сэриини ааһан дойдуларыгар төннөн кэлэн эйэлээх олоҕу тутуспут ытык-мааны бэтэрээннэрбитигэр, тыылга үлэлээбит күндү дьоммутугар истиҥ, дириҥ ытыктабылбытын биллэрэн сүгүрүйэбит, махтанабыт, киэн туттабыт.
Ытыктабыллаах дьоммутугар – Аҕа дойду Улуу сэриитин кыттыылаахтарыгар, тыыл бэтэрээннэригэр, сэрии тулаайахтарыгар, сэрии оҕолоругар уонна өрөспүүбүлүкэбит, улууспут бары олохтоохторугар кытаанах доруобуйаны, тус олохторугар уонна дьиэ кэргэттэригэр этэҥҥэ буолууну, бары үтүөнү, кэрэни, сырдыгы, ырааһы баҕарабын!
Руслан ФЕДОТОВ,
СӨ Судаарыстыбаннай Мунньаҕын (Ил Түмэн)
норуодунай дьокутаата,
СӨ норуотун хаһаайыстыбатын үтүөлээх үлэһитэ