Федот Тумусов: Уһук хоту дойду олохтоохторо “олох суолунан” босхо туһаныахтаахтар

Бөлөххө киир:

Уһук хоту дойду оройуоннарыгар уонна итиннэ тэҥнэниллибит сирдэргэ төлөбүрдээх суоллары тутууга көҥүлү биэрэр сокуон барылын Судаарыстыбаннай Дуумаҕа олунньу 5 күнүгэр дьүүллэһии кэмигэр Саха сириттэн Судаарыстыбаннай Дуума дьокутаата Федот Тумусов олох утарарын биллэрдэ.


Саха сириттэн дьокутаат мунньах кыттыылаахтарыгар дойдуга хас бэһис киһи дьадайар кыахха киирэн олорорун, оттон Хоту дойду олох дьадаҥытын санатта. Парламентарий бу быһыыны билиниэххэ диэн санаалаах. Кини санаатынан, төлөбүрдээх суоллары тутуу бэйэтэ да кырыымчыктык олорор нэһилиэнньэҕэ охсуулаах буолуоҕа. Сир баайын хостуур хампаанньалар сүрүн үлэлэрин таһынан социальнай аналларын толоруохтаахтар: “Бэйэтэ да аҕыйах ахсааннаах нэһилиэнньэҕэ “олох суолунан” туһанар кыах бэриллиэхтээх. Дьокутаат Ленскэй оройуонугар “Сургутнефтегаз” чааһынай суолугар тахсыбыт түбэлтэни холобурдаата. Онно хампаанньа харабыллара Витим-Таалакаан технологическай суолунан барарын боппуттарыгар олохтоох киһи саанан ытыалаабытын санатта. “Ленскэй оройуонун хас да бөһүөлэгин олохтоохторо Арассыыйа сиринэн-уотунан айанныыр бырааптара быһыллыбыта. Бу барыта аһаҕас киирсиигэ күһэйбитэ”, — диэн бэлиэтээтэ Тумусов. Кини этэринэн, бу кэнниттэн табаар-таһаҕас таһааччыларга төлөбүрдээх буолбута. Аска-үөлгэ эмиэ. Ол иһин атыыга сыана “тоҕу” барбыта. Оттон легковой массыыналар айанныылларыгар көҥүлгэ биир эмэ киһи тиксэрэ.

“Өскөтүн “Сургутнефтегаз” олохтоохтортон тиһэх харчыларын хомуйар буоллаҕына, маннык төлөбүрдээх суоллары тутар атын хампаанньалар тустарынан тугу этиэххэ сөбүй? Суол кинилэргэ итиннигэ да суох наада – ол эрээри бырабыыталыстыба “Сургутнефтегаз, “Газпром” уо.д.а. курдуктарга харчыланар кыаҕы биэрэр. Маннык суоллар бэйэлэрин ороскуоттарын 20-чэ сылынан сапталлар, ол эбэтэр хампаанньаларга бэйэлэрин былааннарын олоххо киллэрэллэригэр көмөлөһө сатыыллар. Дьэ, бу ким суотугар? Биллэн турар, олохтоохтор суоттарыгар. Билиҥҥитэ кыра массыыналартан харчы хомуйар туһунан кэпсэтии барбат, — диэтэ норуот талбыт дьокутаата.

Туһанылла сылдьар сокуоҥҥа олоҕуран, төлөбүрдээх суолларга босхо альтернатива баар буолуохтаах. Сокуон барылын көҕүлээччилэр сабаҕалыылларынан, айан иһин төлөбүр таһаҕас массыынатыттан ылыллыаҕа, кыра массыыналар уонна уопсастыбаннай тырааныспар босхо айанныахтаахтар. Кэккэ дьокутааттар төһө да утарсыбыттарын үрдүнэн, сокуон барылын дьокутааттар 73 % өйөөтүлэр уонна бастакы ааҕыыга ылыннылар. Саха сириттэн дьокутаат чааһынай хампаанньалар суолу

туталларын туһунан идея сөптөөх эрээри, бу суоллар босхо буолуохтаахтар диэтэ. КПРФ баартыйаттан биир идэлээхтэрэ сөпкө бэлиэтээбиттэрин курдук, “Платон” тиһик курдук балаһыанньа буолан хаалыан сөп. Быһата, барыс — кэтэх тэрилтэҕэ, оттон ороскуота судаарыстыба уонна дьон санныгар сүктэриллиэн сөп.

Яна Байгожаева, Саха сириттэн Арассыыйа Судаарыстыбаннай Дууматын дьокутаатын Федот Тумусов пресс-сэкирэтээрэ.

+1
0
+1
0
+1
0
+1
0
+1
0
+1
0
+1
0