Федот Тумусов тыа сирин медиктэрин өйүүр эбии миэрэлэрин туһунан этиннэ
“Арассыыйа Федерациятыгар гражданнар доруобуйаларын харыстааһын төрүттэрин туһунан” Федеральнай сокуоҥҥа уларытыылары киллэрэр туһунан” (тыа сиригэр үлэлиир уонна олорор медицинскэй, фармацевтическай уонна атын үлэһиттэргэ ый ахсын харчынан толуйууну олохтооһун чааһыгар) сокуон барылын булгуччу өйүүрүн биллэрэн, Саха сириттэн Арассыыйа Федерациятын Госдууматын дьокутаата Федот Тумусов бу олус тыын боппуруос буоларын бэлиэтээтэ.
“Саха Өрөспүүбүлүкэтигэр, холобур, аҥаардас тыа сиригэр 1100 медицинскэй исписэлиис тиийбэт: медсиэстэрэлэр, быраастар, биэлсэрдэр. Эһиги билэргит курдук, кинилэр олус уустук усулуобуйаҕа олороллор уонна үлэлииллэр, манна салгын температурата кыһын 60 кыраадыска тиийэр. Ыччат тыа сиригэр үлэлиэн баҕарбат”, — диэн эттэ Саха сирин парламентарийа уонна сокуон барылын ааптардарыттан бу сокуону ылынар түгэннэригэр оройуоннааҕы коэффициени уонна хотугу надбавканы туһанар былааннаахтарын туһунан чопчуласта.
Ыйытыыга сокуон барылын көҕүлээччилэртэн биирдэстэрэ, ЛДПР фракциятыттан Сергей Катасонов хоруйдаата: “Бу иккис ааҕыыга биллиэҕэ. Уопсайынан, сокуон барылын “ураты тыынын” быһыытынан, субъектарга маннык быһаарыныылары ылынар кыахтаахтарын мэлдьэспэппит. Сокуон араамка иһигэр баар, ол быһыытынан уу харчынан (натуральнай), сыыппаранан уонна, ол иһигэр, ыйытыы бэриллибит үрдэтэр коэффициеннэри туһаныыны көрөр”.
Балыыһаларга уонна биэлсэр-акушер пууннарыгар тиийбэт саҥа исписэлиистэри тыа сиригэр үлэлэтэр туһугар дьиэ-уот ороскуотун ыйдааҕы толуйууну олохтооһуну көрөр тыа сирин быраастарын уонна медүлэһиттэрин социальнай өйөөһүн туһунан сокуон барыла ылыллыбатаҕа. “Биир ньыгыл Арассыыйа” баартыйаттан сокуон барылыгар хос дакылаатчыт Тамара Фролова бэлиэтээбитин курдук, анал кэмитиэт парламентарийдарга бу докумуону бастакы ааҕыыга ылымматтарыгар сүбэлээбит. Кэмитиэт итэҕэс быһыытынан докумуон үп-харчы өттүнэн олоҕо суоҕун уонна Арассыыйа Федерациятыгар субъект быһаарыыны бэйэтэ ылынара сокуоннаһы утарарын ааттаабыт.
Яна Байгожаева, Арассыыйа Федерациятын Госдууматын депутатын пресс-сэкирэтээрэ.