Дойду бэрэсидьиэнэ Төрүт Сокуоҥҥа көннөрүүлэри киллэрэргэ Бүтүн Арассыыйатааҕы куоластааһыны от ыйын 1 күнүгэр ыытыы туһунан эппитэ.
Төрүт Сокуоҥҥа көннөрүүлэри киллэрии туһунан Судаарыстыбаннай Дуума дьокутаата Федот Тумусов санаатын билиһиннэрэбит:
— Сүрүн мөккүөр биир боппуруос тула барар. «Ньууллааһын», ол эбэтэр үлэлии олорор Российскай Федерация салайааччытыгар кэлэр быыбарга кыттарга быраабы биэрии туһунан. Мин санаабар, бу ыстатыйа Арассыыйа былааһын бөҕөргөтүүгэ туһуламмыт. Манна үс өрүт баар.
Бастакытынан, дойду ис өттүгэр туһуламмыт. Хаһан, ханна баҕарар сарсын үлэлээн бүтэн барар киһини истэр, сорудахтарын толоруу мөлтүүр. Бу көстүүнү нууччалыы «синдром хромой утки» диэн ааттыыллар. История көрдөрөрүнэн, былаас уларыйдаҕына экэниэмикэҕэ уларыйыылар эмиэ бараллар. Бас билиини былдьаһыы сытыырхайыан сөп. Сүүс сыллааҕыта ол гражданскай сэриигэ тиэрдибитэ. Ааспыт үйэ 90-с сылларыгар сокуону кэһии, өлөрсүү үксүү сылдьыбыта. Былаас бигэ туруктаах, күүстээх буоллаҕына ити барыта күөдьүйбэт.
Иккиһинэн, дойду тас өттүгэр туһуламмыт хамсаныы буолар. Бары билэн олорорбут курдук, Арҕаа дойдулар Арассыыйаны сөһүргэстэтэр туһугар олус күүстээх үлэни ыыталлар. Өскөтүн былаас тутула мөлтөөтөҕүнэ, кинилэр сыалларын-соруктарын ситиһэллэригэр тоҕоостоох буолуон сөп. Ол курдук, улуу дойду Сэбиэскэй Сойуус ыһыллыбыта. Салайааччы бигэтик олорор буоллаҕына, кинилэр кэпсэтиигэ барарга күһэллиэхтэрин сөп.
Үсүһүнэн, бу күҥҥэ диэри баар сокуонунан билигин үлэлии олорор дойду салайааччыта аныгыс быыбарга кыттара бобуулаах. Ону туора сотон көҥүлү биэрии. Ол көҥүлүнэн тустаах киһи хайдах туһанара — бэйэтин дьыалата. Ол кэмэ кэллэҕинэ быыбардаан, норуот бэйэтэ быһаарыаҕа.
edersaas.ru