Саҥа үйэ биир дьикти өрүтэ биир интэриэстээх дьону бэйэ-бэйэлэрин кытта булсуһуннарарыгар сытар. Оҕуруот аһын үүннэрээччилэр, хаартыскаҕа түһэрээччилэр, биир маарка массыынаны ыытааччылар уонна да атын элбэх. Биир интириэстээхтэр анал чаат арыйаннар, бэйэлэрин икки ардыларыгар сүбэлэһэллэр, санаа атастаһаллар.
edersaas.ru
Биир оннук тэриллибит батсаап бөлөх туһунан үтүө сонун тарҕанна. Ол курдук, “Fabarm” диэн Италия фирматын саатынан туһанар эр дьон бөлөхтөрө кыттыһан, үтүө дьыаланы оҥоруунан дьарыктанар Антон Васильевка 32 000 солкуобай харчынан көмө оҥордулар. Бөлөх кыттыылаахтара Антону кытта Дьокуускай куоракка Орджоникидзе болуоссатыгар көрсөн, муспут үптэрин туттарбыттар.
Түмсүү кыттыылаахтара, Өлүөхүмэттэн, Уус Алдантан, Тааттаттан кэлбит бэрэстэбиитэллэр, Антон үтүө дьыаланы оҥорорун уруккуттан кэтээн көрөллөрүн, кини дьарыгын биһирииллэрин эппиттэр:
— Биһиги бөлөхпүтүгэр Саха сирин бары улуустарыттан элбэх киһи баар. Ньурбаттан, Үөһээ Бүлүүттэн, Мииринэйтэн, онтон да салгыы ааттыы туруохха сөп. Бу күҥҥэ диэри сирэй көрсө илик этибит. Биһиги бөлөхпүтүгэр баар аҕа саастаах дьоммут сүбэлэринэн, Антон, эн дьыалаҕар көмөлөһөргө быһаарынныбыт. Итиэннэ бу сүүстэн тахса киһи кыттыһан, наһаа улахана суох, наһаа кырата суох сууманы мустубут. Төһө даҕаны бары солото суох үлэлии сылдьыбыппыт иһин, бу муспут суумабытын эйигин сирэй көрсөн илиигэр туттараарыбыт, бөлөхтөн ким манна баар дьон көрсөр чиэскэ тиксибиппит туһугар туспа үөрүү. Антон, кытаат, биһиги бары эйиэхэ үтүөнү баҕарабыт, бу курдук үлэлии сырыт! — диэбиттэр.
Антон Васильев бэйэтин инстаграм сирэйигэр бэс ыйын 16 күнүгэр, бу туһунан суруйбут уонна махталын биллэрбит:
— Саха сиригэр баар “Фабарм” бөлөх дьоно 32 000 солкуобай көмө туттардылар. Кинилэргэ улахан махтал! , — диэбит. Дьон убаастабылыттан уонна тапталыттан долгуйбутун, үөрэрин биллэрбит.
Егор Карпов, «Саха сирэ» хаһыат, edersaas.ru