Саха Өрөспүүбүлүкэтин бырабыыталыстыбатын бэрэссэдээтэлэ Евгений Чекин Россия Наукатын күнүгэр анаммыт үөрүүлээх мунньахха кыттыыны ылла. edersaas.ru
Мунньахха мустубут учуонайдары идэлээх бырааһынньыктарынан эҕэрдэлээн туран, уопсастыбаны экэниэмикэ уонна култуура-духуобунас өттүнэн бигэтик сайыннарыыга наука улахан тирэх буолар диэтэ. Өрөспүүбүлүкэ научнай-техническэй кыаҕа улахан, Россия Наукаларын академиятын Сибиирдээҕи салаатын Саха сиринээҕи научнай киинин институттара, научнай-чинчийэр тэрилтэлэр, ол иһигэр, Ирбэт тоҥу үөрэтэр институт, Криолитозона биологическай проблемаларын института, В.П.Ларионов аатынан Хотугу сир физико-техническэй проблемаларын института уо.д.а. киэҥ үлэни ыыталлар. Саха сирэ күрэстэһэр таһымнаах буолуута, үбү-харчыны тардар кыаҕа, Уһук Илиҥҥэ, дойдуга уонна аан дойдуга ылар оруола улаатан иһиитэ наука сайдыытын кытары ыкса ситимнээх диэн тоһоҕолоон бэлиэтээтэ. Олунньу 10 күнүгэр сахаттан бастакынан Россия Наукаларын академиятын дьиҥнээх чилиэнэ буолбут, техническэй наука доктора, профессор Владимир Ларионов төрөөбүтэ 80 сааһа буоларын санатта.
Владимир Петрович тыйыс айылҕалаах, ирбэт тоҥноох Саха сиригэр сир баайын хостуур, гааһы уонна ньиэби туһаҕа таһаарар бырамыысыланнаһы сайыннарыыга киллэрбит сүҥкэн кылаатын үрдүктүк сыаналаата. Кини көҕүлээһининэн Хотугу сир физико-техническэй проблемаларын института, Ньиэп уонна гаас проблемаларын института тэриллибиттэрэ. Арыйыылара, научнай сүбэлэрэ «Уралмаш», «БелАЗ», «Крастяжмаш», Ижорскайдааҕы собуот курдук массыынаны оҥорор бөдөҥ собуоттарга, сир баайын туһаҕа таһаарар «АЛРОСА», «Саханефтегаз», «Якутзолото», «Якутуголь» хампаанньаларга туһаныллыбыттара, туһанылла да сылдьаллар. Билигин академик Ларионов аатын киин куоракка уулусса, физико-техническэй лицей уонна Майа сэл. орто оскуола сүгэллэр. В.П. Ларионов аатынан эдэр учуонайдарга, Н.Э.Бауман аатынан Үрдүкү техническэй училище устудьуоннарыгар бэриллэр бириэмийэлэр, учуонайдарга уонна устудьуоннарга граннар олохтоммуттара. Саха сирин олохтоохторо Владимир Петрович өрөспүүбүлүкэ судаарыстыбаннаһа уонна саха науката сайдыытыгар кылаатын умнубаттар.
Раиса Сибирякова, edersaas.ru