А.Е.Кулаковскай аатынан норуоттар доҕордоһууларын дьиэтигэр «ЭтноКраса-2019» норуоттар икки ардыларынааҕы куонкурус иккис төгүлүн ыытылынна. Күөн күрэскэ 14 кыыс кытынна диэн пресс-сулууспаттан иһитиннэрэллэр.
Бырайыак ааптара, А.Е.Кулаковскай аатынан норуоттар доҕордоһууларын дьиэтин национальнай култуураларга Киинин салайар Ирина Стрекаловская куонкурус туһунан санаатын үллэһиннэ:
— Быйылгы күрэс Саха Өрөспүүбүлүкэтигэр сомоҕолоһуу, «Саха сирин норуоттарын ассамблеята» уопсастыбаннай хамсааһын 25 сылларыгар, норуоттар доҕордоһууларын дьиэтин 40-с айар дьыла саҕаламмытыгар ананна. Бырайыак Саха сиригэр олорор элбэх бырааттыы норуоттар култуураларын, кинилэр доҕордуу сыһыаннарын, түмсүүлээхтэрин көрдөрөр соруктаах.
Куонкуруска кыттыбыт кэрэ куолар дьоҕурдарын билиһиннэрдилэр, национальнай бүлүүдэлэрин бар дьоҥҥо сыаналаттылар, норуоттарын ураты кырасыабай көстүүмүнэн хаамтылар. Сүрүн болҕомто уонна ирдэбил күөн күрэскэ кыттааччы бар дьон иннигэр бэйэтин төрөөбүт омугун култууратын, сиэрин, үгэһин арыйан көрдөрүүтүгэр уурулунна.Кырасыабай кыргыттар бары да ураты кэрэлэрэ, чаҕылхайдара, хас биирдиилэрэ өбүгэлэрин сиэрин-туомун, үгэһин, устуоруйатын билэллэрэ-көрөллөрө, норуоттарыгар тапталлара көрөөччүлэри да, дьүүллүүр сүбэни да улаханнык астыннарда.
Горнай улууһун Бэрдьигэстээҕиттэн гимназия 10 кылааһыгар үөрэнэр Джума Магомедова: —Олус интэриэһинэй бырайыакка кытынным. Наһаа элбэҕи биллим-көрдүм, — диэн үөрүүтүн үллэһиннэ.
Кыталыктыы кынтаспыт кэрэ кыргыттар куонкурустара «ЭтноКраса-2019» тас көстүүнү эрэ сыаналааһыҥҥа буолбакка, билини-көрүүнү тугутара дьону ордук үөрдэр. Түмүккэ, кыргыттар бары куонкурус ааптара Ирина Стрекаловскаяны кытары Галина Ненашева репертуарыттан «Любите Россию» ырыаны ыллаатылар.
А.Е.Кулаковскай аатынан норуоттар доҕордоһууларын дьиэтин генеральнай дириэктэрин бастакы солбуйааччы Розалия Колосова салайааччылаах дьүүллүүр сүбэ быһаарыытынан, куонкурус быйылгы кыайыылааҕынан Саха сирин эбэҥкилэрин ассоциациятын бэрэстэбиитэлэ Анастасия Кириллина буолла.
—Өлөөн улууһун Харыйалааҕыттан сылдьабын. ХИФУ естественнэй наукалар институттарыгар төрдүс кууруска үөрэнэбин. «Гиркилэн» ансаамбылга сылдьабын. Төрөөбүт норуотум үгэһин, сиэрин-туомун билэргэ кыһаллабын, — диэн «ЭтноКраса» быйылгы кыайыылааҕа эттэ.
Бастакы вице аатын «Күн судаар дьаамсыктар удьуордара» түмсүүттэн кыттыбыт Дарья Слепцова, иккис вице аатын «СӨ нууччалар общиналара» түмсүүттэн Диана Ансимова ылан үөрүү-көтүү үксээтэ.
Хаартыскаҕа Айталина Аргунова түһэриилэрэ.