Спорт араас көрүҥэр рекордары олохтообут, куоһарбыт ситиһиилээх ыччаппытын таһаарабыт.
Степанида Артахинова – Өлүөхүмэ улууһуттан төрүттээх. 2012 сыллааах Паралимпиада боруонса призера, норуоттар икки ардыларынааҕы кылаастаах маастара, Россия спордун үтүөлээх маастара. Ааспыт 2015 сыл күһүнүгэр Донаушинген куоракка ыытыллыбыт оҕунан ытыыга аан дойду чемпионатын кыайыылааҕа буолбутун таһынан, өссө аан дойду рекордун куоһарбыта. Буолуохтаах 150 очукуоттан 147-ни табан, аан дойду рекордун аһарбыта.
Егор Филиппов – Хаҥалас улууһуттан төрүттээх, атах оонньууларыгар спорт маастара, ыараханы көтөҕүүгэ Россия спордун маастара. Ааспыт сыл сайыныгар буолбут чэпчэки атлетикаҕа Саха сирин чемпионатын кэмигэр 7 м 30 см уһуну ыстанан Саха сирин рекордун олохтообута. Егор ыстаҥа араас көрүҥэр өрөспүүбүлүкэ уонтан тахса рекордун олохтообута.
Василий Румянцев – Уус Алдан улууһуттан төрүттээх, остуол тенииһигэр Уһук Илиҥнээҕи федеральнай уокурук үс төгүллээх чемпиона. Кини сахалартан аан бастакынан остуол тенниһигэр Россия спордун маастарын нуорматын толорбута.
Егор Протопопов – Нам улууһуттан төрүттээх, М.К. Аммосов аатынан ХИФУ Хотугу норуоттар тылларын уонна култуураларын институтун устудьуона. 2015 сыл сайыныгар тутум эргииргэ Саха сирин турнирыгар бастаабыта. Егор бэриллибит икки мүнүүтэҕэ 54-тэ эргийэн өрөспүүбүлүкэ рекордун куоһарбыта.
Николай Николаев – Бүлүүттэн төрүттээх, «Дыгын оонньууларын» кыттааччыта, Саха сирэ уонна Россия оту охсууга күрэхтэһиигэ хас да төгүллээх чемпиона. 2014 сыллаахха Нововоронеж куоракка буолбут Х-с Россиятааҕы тыа сирин сайыҥҥы спортивнай оонньууларыгар 43 сөкүүндэ иһигэр 5х5-тээх сири охсон, Россия рекордун олохтообута.
Спортсменнарбыт өссө күүскэ дьарыктанан саҥа рекордары олохтуулларыгар, куоһаралларыгар баҕарабыт.
Айтана АММОСОВА.
Хаартыскалар Интернет ситимиттэн туһанылыннылар.