“Хэллоуин” диэн арҕааҥы дойду бырааһынньыгын сэтинньи 1 күнэ үүнэр түүнүгэр бэлиэтиибит. Сэтинньи 1 күнүгэр католиктар Сибэтиэйдэригэр сүгүрүйэллэр эбит. Ол иннинэ – абааһылары “үүрэллэр”, “куттууллар”. 90-с сылларга Европаҕа, Америкаҕа уһуллубут “Фокус-покус”, “Ведьма из Блэр”, “Канун всех святых” о.д.а. киинэлэри көрөн улааппыт дьон бу күнү “бэйэбит бырааһынньыкпыт” диэн ылынар. Эрдэттэн тэринэр – араас абааһы, дэриэтинньик, кыыл-сүөл маскарадын оҥостор.
Бу өрөбүллэргэ Хэллоуиҥҥа аналлаах тематическай бырааһынньыктар буоллулар. Маныаха Дьокуускай олохтоохторо туох уобарастаммыттарын Инстаграм ситимтэн көрдүбүт.
-
“Отряд самоубийц” киинэ бу сайын тахсаатын кытта, Хэллоуиҥҥа Харли Квин («DC» хампаанньа комикстарыгар куһаҕан кыыс) арааһа баар буолуо дии санаабыппыт.
2. Дэриэтинньик, аныгылыы “зомби” диэххэ сөп, Хэллоуин аайы баар. Өлөн баран, ииҥҥэ киирбэккэ, буор кутугар куһаҕан тыын иҥмит киһитэ. 3. Кыргыттар өлбүт, хаан-билик буолбут сиэстирэ уобараһын олус сөбүлүүллэр эбит. 4. Аатырбыт киинэттэн эҥин араас дьоруойу ыччат сөбүлээн үтүктэр. “Люди Х” киинэттэн – Мистик. Эмиэ “Marvel” комиксын дьоруойа. Бэркэ кырааскаламмыт. Лайк! 5. Япония ужастига аһары дьиҥнээх, киһи уйулҕатыгар дьайар күүстээх. Аҥаардас “Звонок”, “Проклятие”, “Глаз”… Маҥан таҥастаах, уһун хара баттаҕынан сирэйин саһыарбыт “Звонок” абааһытын саха кыргыттара уонча сыл устата үтүктэн кэллилэр. Билигин даҕаны дьоппуон ужаһын тыына Хэллоуиҥҥа биллэр эбит.
Саха саҕа абааһыттан куттанар, абааһы арааһын айан, тылынан уус-уран айымньытыгар, литэрэтиирэтигэр киллэрбит норуот аҕыйах. Алаа Моҕус, Арсан Дуолай, иччилэр, үөр буолбут дьон, чөчүөккэ… Дьиктитэ диэн, Хэллоуиҥҥа атын омук эрэ абааһыларын көрсөбүт. Баҕар, аньыырҕыыллара буолуо…
P.s: Бу суруйа олорон, саха абааһыларын санаан, этим сааһа арыллан ылла. Төрүт үгэһи таарыйбат, түөрбэт ордук эбит. Ол кэриэтэ оонньуу-көр сиэринэн вампиры, Харли Квины үтүктүбүт көнө.
Бэлэмнээтэ: Надежда САМСОНОВА
Хаартыска: Инстаграм