Өрөспүүбүлүкэҕэ биллэр куукула оҥорор норуот маастара Василий Андросов үөрэнээччитэ Лидия Николаева ураты, эриэккэс куукулалары, араас кыыллары түүнэн хатайдаан (валяние), папье-машенан оҥорор.
Мэҥэ Хаҥалас улууһун Тарат оскуолатын учуутала Лидия Николаева аан бастаан тириинэн уонна сарыынан оскуола оҕолоругар оҕустаах уолу оҥорбута. Олус уустук, ол эрээри умсугутуулаах дьарыгын салгыы сайыннарар баҕаттан, норуот маастара Василий Андросовка үөрэммитэ. Онно сылдьан папье-маше матырыйаалынан оҥорорго үөрэнэн барбыта.
– Маастар тус-туспа буочардаах, ураты хатыламмат оҥоһуктардаах буолар. Өрүү быыстапкаларга сылдьан көрсөн, билсэн, уопут атастаһабыт. Хабаровскайтан анаан-минээн кэлэн, түүнэн хатан оҥорууга маастар-кылаас тэрийбиттэрэ. Бу дьарыкпынан элбэх маастар-кылаас, куруһуок ыыттым. «Айыы кыһата» оскуола сайыҥҥы лааҕырыгар үһүс сылбын үлэлиибин. Онно «Өбүгэлэрбит үгэстэринэн» диэн анал бырагыраама оҥорон, сиэл, туос оҥоһуктары оҥорууга сүрүн болҕомтобутун уурабыт, – диэн Лидия Михайловна кэпсиир.
Билигин куукула оҥоһуутунан дьарыктанар киһи элбээтэ. Куукула оҥоһуутунан дьарыктанааччылар бэйэлэрэ туспа түмсүүлээхтэр. Дьокуускай куоракка “Симэх” арт-салоҥҥа “Кукла в национальном костюме” диэн өрөспүүбүлүкэтээҕи көрүү-быыстапкаҕа наар кытталлар.
Анивера АКИМОВА.