Былырыыҥҥы чахчыларынан, Арассыыйаҕа кэрэ аҥаардар эр дьоннооҕор, ортотунан ыллахха, 10-ча сыл кэриҥэ уһуннук олороллор.
edersaas.ru
Бу көстүү син биир туох эрэ төрүөттээҕэ сэрэйиллэр. Ол иһин, эр дьон доруобуйатын туһунан кэпсэтэргэ Өрөспүүбүлүкэтээҕи 3 №-дээх килиниичэскэй балыыһа амбулаторнай хирургиятын бастакы категориялаах уролог-бырааһа Прокопий Давыдовтан көрдөстүбүт.
50 сааһын ааспыт эр киһи туохтан куттанар?
“Эр киһи үксүгэр доруобуйата аһааҕырдаҕына даҕаны, онно болҕомтотун уурбат, наадыйбат. Инньэ гынан, ыарыыга баалатан кэбиһэр. Бырааска сэдэхтик көрдөрөр. Сорохтор 50 саастарыгар тиийэллэригэр, номнуо баалаппыт ханнык эрэ ыарыылаах буолаллар. Хомойуох иһин, ону сэрэйэн да көрбөттөр.
Статистика көрдөрөрүнэн, араас саастаах эр дьон 60 бырыһыаннара простатиттан эмсэҕэлиир уонна кинилэр 10 эрэ бырыһыаннара уролог-бырааска кэлэн көрдөрүнэр”, – диэн Прокопий Давыдов ыарыыны эрдэттэн сэрэтэр туһугар эр дьону сылга саатар биирдэ доруобуйаларын көрдөрүнэллэригэр сүбэлиирэ оруннаах.
Кини этэринэн, 50 сааһын аһарбыт эр дьон үксэ дисфункцияттан (норуокка “импотенция” дииллэр) куттанар. Дьиҥэр, бу – бэйэ доруобуйатын (сүрэх-тымыр систиэмэтин, бүөр, быар, куртах-оһоҕос, эндокриннай систиэмэ ыарыыларын) көрдөрүнэр наадатын биллэрэр бэлиэ.
Простатит сибикилэрэ
— Эр дьон көрсөр өссө биир кыһалҕаларынан простатит буолар. Простатит – эр киһи уорганын сүһүрүүтэ. Сүһүрүү урогенитальнай инфекцияттан эрэ буолбакка, сотору-сотору уонна күүскэ тоҥууттан, хамсаммакка олорортон, уойууттан, аһыы уонна туустаах аһылыгы элбэхтик сиэһинтэн, араас эчэйииттэн, биэссэстибэлэр сыыһа атастаһыыларыттан уо.д.а. үөскүөн сөп.
Простатиттыыр кутталлаах бөлөххө саастаах уонна эдэр дьон киирсэллэр. 18 саастаах уолаттар да баар буолаллар. Бу ыарыы сибикилэригэр аахайбат эр дьон аҕыйаҕа суох. Дьиҥэр, бу сибикилэри киһи өйдүөн сөп.
Ыарыы бастакы түһүмэҕэр эр киһи туалекка элбэхтик сылдьарын, эрекцията кэһиллэрин бэлиэтии көрөр. Быттык, ахта диэкинэн кыратык ыалдьыан сөп. Простатит улаатан истэҕинэ, ыарыһах кыраадыһа үрдүүр, ииктииригэр ыарытыннарар, убаҕастыҥы кэлэр уонна организмҥа уларыйыылар тахсаллар. Итинник сибикилээх дьон ыарыы номнуо олоҕурбутун кэннэ эрэ бырааска кэлэллэр. Ыарыыны эмтээбэтэххэ, оҕо үөскээбэт буолуутугар уонна эректильнай дисфункцияҕа тириэрдиэн сөп. Онон, бэйэ доруобуйатыгар аахайымтыата суох сыһыаннаһыы содулларын учуоттаан, ыарыы бастакы сибикитэ билиннэ да, бырааска барыахха наада. Ыарыы төһөнөн эрдэ биллэр да, соччонон түргэнник эмтэнэр.
Циркумцизия диэн тугуй?
Уопуттаах быраас уонна эпэрээссийэлиир хирург Прокопий Давыдов циркумцизия өҥөтүнэн туһанарга – ууһатар уорган кытыы этиттэн быһарга (обрезание) сүбэлэри биэрэр. Кини этэринэн, бу дьахтар уонна эр киһи сылдьыһыытыттан бэриллэр инфекциялар киирэр кутталларын кыччатар. Циркумцизия, варикоцеле эпэрээссийэлэрэ, ууһатар уорганнарга «доброкачественнай» үөскээһиннэри (образование) суох оҥоруу уонна урология атын да эпэрээссийэлэрэ ситиһиилээхтик оҥоһуллаллар. Манна эбэн эттэххэ, ууһатар уорганын сэлтэҕэ сотору-сотору сүһүрэр дьоҥҥо (баланит) ууһатар уорган этиттэн быһан ыллартарарга эмиэ сүбэлииллэр.
Ол туһунан Прокопий Викторович маннык этэр:
“Психологтар итэҕэтэллэринэн, эр дьоннор ууһатар уорганнарыгар скальпеллаах илии чугаһыырын туһунан саныыллара да табыгаһа суох курдук. Ол да буоллар, кэнники сылларга арҕаа дойдуларга маннык эпэрээссийэҕэ наадыйааччы элбээбитэ бэлиэтэнэр. Хомойуох иһин, биһиги дойдубутугар нэһилиэнньэҕэ циркумцизия туһунан сырдатыллыбат. Арассыыйаҕа маннык процедура үксүгэр эрэйинэн ииктиир, фимоз уо.д.а. ыарыыларга оҥоһуллар. Прокопий Давыдов этэринэн, тоҥор-хатар булчуттар уонна балыксыттар маннык өҥөнөн туһаналлара элбээн эрэр.
Сорох сонуну киэҥник тарҕатар сириэстибэлэр уонна эрэкэлээмэлэр биир эрэ табылыакка эбэтэр ханнык эрэ аптаах аппараакка оҥоһуллар сеанс эр киһини ханнык баҕарар кыһалҕаттан босхолуур диэн күүскэ итэҕэтэ сатыыллар. Ити – сыыһа өйдөөһүн. Бэйэ билэринэн эмтэнии хомолтолоох содуллардаах буолуон сөп. Бэйэ доруобуйатыгар кыһаллыы, ыарыыны сэрэтэр миэрэлэри ылыы, кэмигэр бырааска көрдөрүнүү уонна наада буоллаҕына, үрдүк квалификациялаах быраастарга эмтэнии эһиги доруобуйаҕыт чэгиэн-чэбдик туруктаах буолалларын мэктиэлииллэр.
ЫСПЫРААПКА:
Прокопий Давыдов 2005 сыллаахха Саха судаарыстыбаннай университет мэдиссиинэҕэ институтун бүтэрбитэ. Онтон 5 сыл хирурунан, 10 сыл урология хайысхалаах балыыһаҕа үлэлээбитэ.
«Саха сирэ», edersaas.ru cаайтка анаан Маргарита ФЕДОРОВА