Киһи эмиэ суотабай төлөпүөн курдук ис кыаҕа иитиилээх, онтон ол эниэргийэтэ бүтэн хааллаҕына түргэнник сылайар, түүн сатаан утуйбат, сарсыарда улахан эрэйинэн турар.
Сыл бүтэһигэр отчуот мунньуллан, үлэҕэ-дьиэҕэ түбүк элбээн, үгүс дьон сэниэлэрэ эстэн, бырааһынньык иннинэ дэлби сылайан хаалаллар. Саҥа дьылга симэнэн күлүмүрдүү турар харыйа да соччо үөрдүбэт курдук. “Дьоммор бэлэх ылаары маҕаһыын кэрийиэм этэ да, халыҥ таҥастаах хас да этээһинэн сүүрэрбин санаатахпына, баҕа санаам көтөн хаалар”, — диэччилэр элбэхтэр.
Уйулҕа үлэһиттэрэ: «Мин бу үлэни оҥоруохтаахпын диэн буолбакка, маны оҥоруохпун баҕарабын, оччоҕо туох үчүгэйи ситиһэргитин, ол үтүө өрүттэрин ааҕыахтааххыт. Иккиһинэн, туруоруммут сыалгытын ситистэххитинэ, кыратык даҕаны бэйэҕитин хайҕанан, үс күн сынньана түһүөхтээххит, эбэтэр төлөпүөҥҥүтүн арааран баран тыаҕа күүс-уох ыла бараҕыт. Саамай сүрүнэ үлэ-дьиэ күн аайы хатыланар эйгэтин уларытан, сэргэхсийэ түһэр туһалаах. Ону таһынан, бу сылга тугу ситиспиккитин чөмчөттөххүтүнэ, ис кыаххыт үрдүү түһүө», — диэн сүбэлииллэр.
Марианна Тыртыкова, «Саха сирэ», edersaas.ru