Эминэн хааччыллыыны дьүүллэстилэр

Бөлөххө киир:

РФ сокуонунан, нэһилиэнньэ кэккэ араҥатын эмтээх препараттарынан хааччыйарга чэпчэтиилээх өҥө көрүллэр. Эмтэр федеральнай уонна регион таһымнаах бүддьүөттэр суоттарыгар ылыллаллар. 2018 сылга чэпчэтиилээх өҥөнөн хааччыйыыны үбүлээһин уопсай кээмэйэ, 2016 сылы кытары тэҥнээтэххэ, 16,6 % улаатта.

edersaas.ru

Чэпчэтиилээх эминэн хааччыйарга сылга бүддьүөттэн 380 миллиартан тахса суума ороскуоттанар. Онон, биир сүрүн соругунан бэриллэр үп туһалаахтык ороскуоттанарын хонтуруоллааһын боппуруоһа буоларын РФ Госдууматын дьокутаата Галина Данчикова СӨ Судаарыстыбаннай мунньаҕын (Ил Түмэн) доруобуйа харыстабылыгар, социальнай көмүскэлгэ, үлэҕэ уонна дьарыктаах буолууга бастайааннай кэмитиэт киэҥ ыҥырыылаах мунньаҕар иһитиннэрдэ.
Галина Иннокентьевна эппитинэн, билиҥҥи чэпчэтиилээх өҥөнөн туһаныы систиэмэтэ көдьүүһэ кыра. Хомойуох иһин, билиҥҥи систиэмэ тустаах киһи дьиҥ наадыйыытын учуоттаабат, улуустарга чэпчэтиилээх өҥөнү үбүлээһиҥҥэ тэҥэ суох быһыы тахсар.
Соторутааҕыта РФ Федерациятын Сэбиэтин сенатордара Саха сиригэр “Эмтээх сириэстибэлэри туһаныы туһунан” 65 №-дээх федеральнай сокуоҥҥа уларытыылары киллэрэргэ эппиттэрэ. Ол гынан баран, СӨ Ил Түмэнэ сокуоҥҥа көҕүлээһиннэрин өссө көрөргө төттөрү ыыппыттара.
Онон: “Биһиги, эмп-том нэһилиэнньэҕэ тиийимтиэ буоларыгар тугу ситиһиэхтээхпитин, бастатан туран, эһиги, идэлээх дьон, санааҕытын истиэхпитин баҕарабыт. Бу боппуруоһу дьүүллэһэн, уопсай быһаарыы ылыныахтаахпыт”, — диэн киэҥ ыҥырыылаах мунньаҕы сүрүннээн ыыппыт Владимир Чичигинаров мустубут дьону дьүүллэһиигэ ыҥырда.


СӨ доруобуйа харыстабылын миниистирин солбуйааччы Людмила Вербицкая бэлиэтээбитинэн, эминэн хааччыйыыга үп ороскуота улаатарыгар:
— чэпчэтиинэн туһанар киһи ахсаана элбии турара;
— олоххо-дьаһахха наадалаах уонна улахан суолталаах препараттар испииһэктэрин элбэтии;
— медицинскэй көмөнү оҥоруу стандартарын киллэрии;
— үрдүк технологиялаах эпэрээссийэлэр ахсааннара элбээһинэ (эмтэнээччи эпэрээссийэ кэнниттэн олоҕун тухары эмтээх препараттары туһанара наада буолар);
— эминэн туһаныы клиническэй көдьүүһэ кырата;
— федеральнай килииникэлэр исписэлиистэрэ олоххо-дьаһахха наадалаах уонна дьоһун суолталаах эмтэр испииһэктэригэр киирбэт эмтэри аныыллара дьайаллар.

Судаарыстыбаннай Мунньах бэрэссэдээтэлин солбуйааччы Антонина Григорьева, биэс сыллааҕыга тэҥнээтэххэ, нэһилиэнньэттэн үҥсүү-харсыы киирэрэ аҕыйаабытын бэлиэтээн туран, СӨ Доруобуйа харыстабылын министиэристибэтин  уонна өрөспүүбүлүкэтээҕи аптыакалар ситимнэрин үлэлэрин хайҕаата.
Бу күн искэн ыарыылаахтары эминэн хааччыйыы боппуруоһа ураты болҕомтоҕо ылылынна. Владимир Чичигинаров аҕалбыт чахчыларынан, 2019 сылга искэн ыарыыларын утары охсуһуу үлэтигэр  200 миллиард солкуобай курдук үп бэриллиэҕэ (РФ доруобуйатын харыстабылын историятыгар аан бастаан маннык элбэх үп көрүллэр). Бу үп көмөтүнэн химиотерапияҕа наадыйааччылар бары толору эмтэнэллэрэ ситиһиллиэхтээх. 2019 с. ыам ыйыттан бу ыарыһахтарга медицинскэй көмө хаачыстыбатын хонтуруоллааһыҥҥа саҥа автоматизированнай ньыма киллэриллиэҕэ.
Ону тэҥэ, билигин орфаннай ыарыылар саҥа араҥалара дьүүллэһиллэллэр, бу ыарыылары эмтээһин инникитин эмиэ бүддьүөккэ көһөрүллүөҕэ

ЫСПЫРААПКА:
Саха сиригэр фармация үлэтинэн дьарыктанарга 298 юридическай сирэй уонна биирдиилээн урбаанньыт көҥүллээх;
— Кинилэр 1016 эбийиэктээхтэр;
— Аптыаката суох нэһилиэнньээх пууннар олохтоохторун 117 учаастактааҕы балыыһа, 61 быраас амбулаторията, 181 биэлсэр-акушер пууна, 14 биэлсэр пууна эминэн хааччыйаллар.

Надежда ЕГОРОВА, “Саха сирэ” edersaas.ru

+1
0
+1
0
+1
0
+1
0
+1
0
+1
0
+1
0