Бу түүн Бүлүү улууһун Киров сэлиэнньэтигэр алдьархай таҕыста — түөрт киһини саанан ытыы түмүгэр, икки киһи миэстэтигэр өлбүт, икки киһи бааһырбыт.
РФ Силиэстийэлиир кэмитиэтин Саха сиринээҕи управлениета иһитиннэрбитинэн, бу чахчынан РФ Холуобунай кодексатын 105-с ыст. 2-с чааһын «а», «в» пууннарынан холуобунай дьыала тэриллибит. Икки киһини соруйан өлөрүү уонна икки киһини өлөрөргө суудайыы бэлиэтэ баарынан.
Силиэстийэ быһаарбытынан, бэс ыйын 11 күнэ үүнэр түүнүгэр 54 саастаах киһи бэйэтин дьиэтин тэлгэһэтигэр абааһы көрөр санааттан 12 калибрдаах «МЦ-21» саатынан түөрт киһини ыппыт.
Ол түмүгэр, 27 уонна 29 саастаах эр дьон миэстэтигэр өлбүттэр. 26 уонна 45 саастаах балыыһаҕа киллэриллибиттэр.
Ыраах сытар нэһилиэк буолан, быһылаан сиригэр сарсыарда 11.00 чааска суһал-силиэстийэлиир бөлөх бөртөлүөтүнэн тиийэн үлэлиир.
Санатар буоллахха, ыам ыйын 31 күнэ үүнэр түүнүгэр Мэҥэ Хаҥалас улууһун Табаҕа сэлиэнньэтигэр бииргэ арыгылааһын түмүгэр, икки киһини саанан ытан өлөрүү тахсыбыта.
Оттон бэс ыйын 9 күнүгэр Нерюнгри оройуонун Чульман бөһүөлэгэр 60 саастаах киһи даачаҕа ыалларын кытта кыыһырсан баран, 38 саастаах эр киһини, кини 39 саастаах хат ойоҕун уонна кинилэр 14 саастаах кыыстарын ытан өлөртөөбүтэ.
Биһиги корр., «Саха сирэ» хаһыат, edersaas.ru
Хаартыска: интэриниэттэн.