Бүгүн, ыам ыйын 3 күнүнээҕи туругунан, Өлүөнэ өрүскэ муус алын кытыыта Ленскэй куораттан 40 км Батамай сэлиэнньэтигэр тиийдэ. Ленскэй куоракка уу суукка устата 539 см эбилиннэ, муус хойуутук устар. Нүүйэҕэ ырбыыланна. Икки-хас хонугунан Нүүйэ – Маача учаастагар муус барыыта күүтүллэр. Бу нуорматтан 12 күн эрдэлээһин буолар. Ити туһунан Уу ресурсаларын федеральнай агентствотын Өлүөнэ сүнньүнээҕи ууга управлениета иһитиннэрэр.
Өлүөхүмэ оройуонугар уу сууккаҕа 40-тан 70 см диэри тахсар. Куорат аннынан чугастаагынан икки суукка иһигэр муус хамсыыра күүтүллэр. Олоохуна өрүс уута тахсан, Солянка гидропоһугар олохтоох муус хамсааһына бэлиэтэнэр.
Өлүөнэ өрүс Өлүөхүмэ – Хатыҥ Тумул учаастагар өрүс эстиитэ ыам ыйын 5-8 күнүгэр күүтүллэр, бу нуорматтан 8-11 суукканан эрдэлээһин буолар.
Киин улуустарга (Өлүөнэ өрүскэ) уу таһыма сууккаҕа 20-40 см тахсар, ууланна.
Олоохуна өрүскэ, Өлүөхүмэ улууһун Куду Күөлүнээҕи гидропостка муус хамсааһына уонна ырбыы бэлиэтэнэр.
Алдан өрүс баһынан Суон Тиит гидропоһугар муус хамсаата, ырбыыланна.
Алдан өрүскэ, Алдан уонна Уус Маайа оройуоннарыгар уу таһыма сууккаҕа 15-тэн 70 см, Томпо оройуонугар 2-тэн 10 см диэри тахсар.
Амма өрүскэ Буяга – Амма учаастагынан 30-70 см диэри уу таһыма эбилиннэ.
Оттон Бүлүү өрүс устатын тухары уу кэлиитэ биэлиэтэнэр.
Быйылгы сылга Өлүөнэ уонна Халыма өрүстэргэ мууһу мөлтөтүү тэрээһинэ 8 муниципальнай тэриллиигэ 46 муус харар сиригэр, ол иһигэр хараардыы 39 учаастакка (486.187 га), 7 учаастакка мууһу эрбээһин (уопсайа, 41 км) үлэ толорулунна.
Онон 41 км мууһу эрбээһин былааннамытыттан 41 км (100 %) туолла, 486,187 га хараардыы былааннаммытыттан 486,187 га (100 %) толорулунна.
Уу ресурсаларын федеральнай агентствотын Өлүөнэ сүнньүнээҕи ууга управлениетын эбийиэктэригэр кутталлаах быһыы бэлиэтэммэтэ. Ууну хаайар сирдэр эрэсииминэн үлэлииллэр.
edersaas.ru