Элгэтээҕи таас чох комплексын сайдыытын Саха сирин баһылыга уонна таас чохтоох бырайыак салалтата дьүүллэстилэр
Элгэтээҕи таас чох комплексын сайдыытын Саха сирин баһылыга уонна таас чохтоох бырайыак салалтата дьүүллэстилэр.
Элгэтээҕи таас чох баайдаах сир кэлимсэ сайдыытын туһунан Саха сирин баһылыга Айсен Николаев, “А-Проперти” бас билээччитэ Альберт Авдолян уонна “Эльга Уголь” салайар хампаанньа” ХЭТ генеральнай дириэктэрэ Александр Исаев дьүүллэстилэр.
130 миллиард солкуобай инвестиционнай кыахтаах сайдыы бырагыраамата 2023 сылга таас чоҕу хостооһуну 5-тэн 45 мөлүйүөн туоннаҕа диэри улаатыннарары сабаҕалыыр. Маны сэргэ “Эльга-Улак” тимир суол 30 мөлүйүөн туоннаҕа диэри сылга аһарар кыаҕы биэриэҕэ уонна Ванино пуорт акваториятыгар сүөкүүр сири тутуу былааннанар. Ону сэргэ бу баайдаах сиргэ хайа кэмбинээтин аан дойду экологияны харыстааһыҥҥа уонна технологияҕа ирдэбиллэригэр эппиэтиир гына тутуу ыытыллыахтаах. Бастакы түһүмэххэ 32 мөлүйүөн туонна таас чоҕу таҥастыахтара. Салгыы кыамтаны 45 мөлүйүөн туоннаҕа диэри улаатыннарыахтара уонна түмүгэр 30 мөлүйүөн туонна бэлэм концентраты ылыахтара.
“Бэс ыйыгар хампаанньа 500 тыһыынча туоннаны хостоото, от ыйыгар 650 тыһыынча туоннаҕа тиэрдиэхпит. Алтынньыга хостооһуну 1 мөлүйүөн туоннаҕа диэри улаатыннарыахпыт, ону сэргэ “Эльга-Улак” тимир суол аһарар кыамтата сылга 12 мөлүйүөн туоннаҕа диэри тиийиэҕэ”, — диэн кэпсээтэ Александр Исаев.
Өрөспүүбүлүкэ баһылыга ханнык хампаанньалар бу бырайыакка үлэлииллэрин туоһуласта.
Альберт Авдолян Айсен Николаевка бииргэ үлэлиир партнердарын туһунан эттэ. Кинилэр истэригэр Арассыыйаҕа 2006 сылтан үлэлиир ESTA Construction хампаанньа баар. Бырайыагы салайыыга AECOM норуоттар икки ардыларынааҕы хампаанньа үлэлэһэр. Coralina Engineering норуоттар икки ардыларынааҕы инжиниринговай хампаанньа хайа кэмбинээтигэр оборудованиетын хааччыйыаҕа.
Кэлимсэ сайдыы бырайыага эрэгийиэн бүддьүөтүгэр үбү-аһы тардыахтаах, Саха сирин олохтоохторугар үлэ миэстэтин таһаарыахтаах.
sakha.gov.ru саайтан Женни СТРЮКОВА бэлэмнээтэ.
Хаартыска: sakha.gov.ru