Бүгүн сарсыарда 11 чааска СӨ доруобуйа харыстабылын миниистирэ Елена Борисова коронавирус туругун туһунан ыыппыт брифинигэр үлэ былааннаах эрэсиимигэр сыыйа киирэргэ бэлэмнэнэбит диэтэ.
edersaas.ru
Ааспыт сууккаҕа өрөспүүбүлүкэ үрдүнэн 55 киһи дьаҥҥа хаптарбыта биллибит. Ыалдьыбыт дьонтон 41 киһи киин куорат, аҕыс киһи улуустар (Сунтаар, Үөһээ Бүлүү, Нам, Нерюнгри, Чурапчы, Уус Алдан) олохтоохторо буолаллар. Ыалдьыбыт дьон изоляцияланнылар, кинилэр алтыспыт дьонноро быһаарыллан, хонтуруолга ылылыннылар. Күҥҥэ 2 330 чинчийии оҥоһуллар. Дьаҥ туруоҕуттан барыта 315 тыһыынча анаалыс оҥоһуллан, бэрэбиэркэлэннэ. Ыарыы ордук сааһырбыт уонна ыарахан ыарыылаах дьону булар, күн бүгүн үгүс киһи «салгын сыттыгынан» сытар. Онон, дьиэ кэргэн да, кэлэктиип да иһинэн хааччахтыыр дьаһаллары тутуһар, бэйэни да, аттынааҕы дьону да харыстыыр ирдэнэрин өссө төгүл санатабыт. Уопсастыбаннай сиргэ мааскалаах сылдьыахха, ирдэнэр тэйиччини тутуһуохха, дезинфекциялыыр үлэни мөлтөтүмүөххэ наада. ОДьКХ сулууспалара элбэх кыбартыыралаах уопсай дьиэлэр подъезтарын, оҕо оонньуур былаһааккаларын эмтииллэрэ күннэтэ хонтуруолланар, ол эрээри, киһи тус бэйэтэ эмиэ эппиэтинэстээх буолуохтаах, илиитин сууна сылдьыахтаах, дьонноох сиргэ мааска кэтиэхтээх.
Киин куораттан оҕолор сайылыы, улахан дьон оттуу тахсыыларынан улуустарга уонна нэһилиэктэргэ ыарыы эмиэ көһүннэ. Ордук элбэх оҕо Уус Алдаҥҥа, Өлүөхүмэҕэ уонна Тааттаҕа тахсыбыта биллэр.
– Сотору, атырдьах ыйын 15 күнүн кэнниттэн, тыаҕа тахсыбыт оҕолор төттөрү кэлиэхтэрэ, оччотугар Дьокуускайга ыалдьыбыт киһи ахсаана эбиллиэн сөп, – диэтэ Елена Афраимовна. – Онон, сэрэхтээх буолар, изоляцияланыы эрэсиимин тутуһар итиэннэ эмтиир-сэрэтэр үлэни өссө күүһүрдэр сорук турар. Билигин биһиги үлэ былааннаах эрэсиимигэр тахсарга бэлэмнэнэбит, кэлэр нэдиэлэттэн киин куорат тэрилтэлэрэ эмиэ оннук эрэсиимҥэ сыыйа киирэллэригэр эрэнэбит.
Раиса Сибирякова, «Саха сирэ» edersaas.ru.