Бэс ыйын 4 күнүнээҕи туругунан, өрөспүүбүлүкэ үрдүнэн 2308 киһи коронавируһунан ыарыйда, 1037 киһи үтүөрдэ, 10 киһи тыына быһынна. Бу туһунан доруобуйа харыстабылын миниистирэ Елена Борисова социальнай ситимнэргэ быһа эпиир кэмигэр иһитиннэрдэ.
edersaas.ru
—— Хомойуох иһин, коронавирус кырдьаҕастарга эрэ кутталлаах диэн этии сыыһа. Бүгүҥҥү күҥҥэ, 46 уонна 56 саастаах эр дьон коронавирустан өллүлэр. Эдэр, орто саастаах дьон эмиэ ыалдьаллар, бу олус уодаһыннаах ыарыы. Онон өссө төгүл сэрэтэбит, бэйэҕитин, чугас дьоҥҥутун харыстааҥ!
Дьокуускай куоракка сүрүннээн дьиэ кэргэн иһигэр ыалдьаллар. Оҕолор, эдэр ыччаттар биллибэккэ эрэ ыалдьа сылдьан, төрөппүттэрин сыһыараллар, онтон улахан дьонтон үлэлиир тэрилтэлэригэр тарҕанар.
Киин куоракка кылгас кэм иһигэр тыһыынчаттан тахса киһи ыалдьыбытын, атын куораттарга көҥүллэммит ыам ыйын 12 күнүнээҕи “сымнатыы” содулун курдук көрөбүт. Бу кэмҥэ дьон өрүс эстиитин көрө, айылҕаҕа сынньана маассабайдык тахсыбыттара. Ол итинник содуллаах буолла. Онон дьиэҕитигэр олоруҥ, таһырдьа таҕыстаххытына, маасканы, бэрчээккини кэтэргитин умнумаҥ, элбэх буолан мустумаҥ, — диэн кини бэлиэтээтэ.
Ангелина Васильева, “Саха сирэ” хаһыат, edersaas.ru
Хаартыска: sakhapress.ru