Николай Кириллин: «Ирбэт тоҥмут ирэн көҥү түспүт буолуон сөп» (ЭКСПЕРТ САНААТА)

Ааптар: 
Бөлөххө киир:

«Мир» рудникка саахал туһунан санаатын этэригэр, геологияҕа госкэмитиэт бэрэссэдээтэлин солбуйааччынан өр үлэлээбит, бэтэрээн-промышленник, геолог Николай Дмитриевич Кириллинтэн  көрдөстүбүт.

Николай ПОПОВ, https://edersaas.ru/

Николай Кириллин, бэтэрээн-промышленник:

Алмаас хостооһуна диэн, айылҕа оҥоһуутун уларыта сатааһын буолар. Киһи хас биирдии дьайыыта — айылҕа тутулугар орооһуу. Оттон  «Мир» — уустук оҥоһуулаах кимберлит туруупката. Айылҕа бэйэтэ оннук оҥордоҕо. Алмааһы хостоору «Мир» руднигы хаспыттара. Сири хаһан аллараа түспүттэригэр,  метегероичерскэй ууну сүүрдэр горизону (сир тымырын) булаллар. Ол аата сир тымырынан уу сүүрэр. Ол саҕаттан шахтаҕа уу киирэн барбыта биллэр. Оччолорго «АЛРОСА» хампаанньа салалтата ити кыһалҕаны үөрэттэрэ учуонайдары аҕалан үлэлэппитэ, элбэх харчыны бараабыта. Уу киирэрин тохтотор саҥа ньымалары толкуйдуу сатаабыттара да, мин билэрбинэн, кыайтарбатаҕа. Дабылыанньа үөскэтэн, онон ыктаран бетон куппуттара — эмиэ уларыйыы тахсыбатаҕа. Уу кэлбитин курдук кэлэ турбута.  Ол иһин, ити сир тымырдаах араҥаны атын сиринэн, аллараатынан хаһан киирбиттэрэ. Киирбит ууну улахан носуостарынан хачайдаан сир хайдыыларыгар (разломы) аһардар буолбуттара. Итинник кутуу — куттала суох буолуу техникатын ирдэбилигэр эппиэттиир. Ол эрээри, бүтүннүү муус буолан сыппыт ирбэт тоҥҥо — сир хайдыыларыгар элбэх уу мунньулуннаҕа. Ол мууһуран хаалбакка ириэнэх сытан, тоҥ буору ириэрэн-ириэрэн баран көҥү түспүт буолуон сөп диэн сабаҕалыыбын. Ити уруккуттан баар улахан кыһалҕа. Үлэһиттэр, салалта уларыйдаҕын аайы, харах далыттан кистэнэн испит буолуон сөп. Билиҥҥи дьиҥнээх туругу, быыһааччылар эрэ этэр кыахтаахтар. Биһиги, үөһэ сылдьааччылар, таайа сатыыр эрэ кыахтаахпыт. 

Николай Попов, «Саха сирэ» хаһыат, edersaas.ru

+1
0
+1
0
+1
0
+1
0
+1
0
+1
0
+1
0