Бу күннэргэ СӨ үөрэҕин уонна наукатын миниистирэ Владимир Егоров Бүтүн Арассыыйатааҕы судаарыстыбаннай түмүктүүр аттестация (ОГЭ, ЕГЭ) түмүгүн таһаарар киэҥ ыҥырыылаах мунньаҕар кытынна диэн министиэристибэ саайтыгар суруллар.
“Саха сирэ” хаһыат, edersaas.ru
Мунньахха дойду бары субъегын үөрэҕин миниистирдэрэ кыттыбыттар, быйылгы уонна кэлэр 2020 сыллааҕы эксээмэннэр туһунан кэпсэппиттэр. Федеральнай сулууспа эриэйтининэн, Саха сирэ бары хайысханан “күөх зонаҕа” киирбит. Ол эбэтэр, үчүгэйдэр ахсааннарыгар хапсыбыт. Санатан эттэххэ, Рособрнадзор туһааннаах эриэйтини 2016 сылтан таһаарар. Маныаха үөрэх хаачыстыбатын, эксээмэни хайдах туттарбыттарын буолбакка, чопчу эксээмэни тэрийиини, ыытыыны көрөллөр. Үс сыл субуруччу үчүгэйдэр ахсааннарыгар киирэ сылдьыбыт эрэгийиэн, былырыын кэккэ хоту улуустарга кэһиилэр тахсаннар, “араҕас зонаҕа” хабыллыбыппыт. Онон быйыл тупсуу бэлиэтэммит. Итини таһынан, эксээмэни тэрийиигэ, ыытыыга мэктиэлэнэр мэтиэдикэ докумуоннарын оҥорууга бастыҥ быраактыкалаах өрөспүүбүүкэ диэн бастыҥнар кэккэлэригэр бэлиэтэммит итиэннэ эрэгийиэннээҕи кииҥҥэ информацияны куттала суохтук бэрийиигэ уонна хааччыйыыга биэс бастыҥ эрэгийиэн ахсааныгар киирбит.
Людмила ПОПОВА, “Саха сирэ” хаһыат, edersaas.ru
Хаартыска: интэриниэттэн