Былырыыҥҥы эксээмэҥҥэ оҕолор биэс биридимиэккэ 100 баалы ылбыт эбит буоллахтарына, быйыл эбиллэн алта биридимиэт буолбут. Төһө даҕаны национальнай өрөспүүбүлүкэ ахсааныгар киирдэрбит, эксээмэн туттарааччылар үксүн нуучча тылыгар 100 баалы ылаллар эбит. Ити туһунан пресс-туур кэмигэр иһитиннэрдилэр.
СӨ Үөрэҕин уонна наукатын министиэристибэтин Үөрэх хаачыстыбатын кэтээн көрөр киин былырыын саҥа дьиэҕэ көспүтэ. Суруналыыстарга тэриллибит пресс-туур кэмигэр тустаах киин дьиэтин-уотун көрдөрдүлэр, эксээмэн кэмигэр үлэ хаамыыта хайдах барарын билиһиннэрдилэр. Сорох дьон эксээмэн сайын буолла да, онон түмүктэнэр курдук саныыллар эрээри, бэлэмнэнии сылы эргиччи барар диэн ыйаллар. Ол курдук, кэлэр сыллааҕы эксээмэн хампаанньата ахсынньыттан, өйтөн суруйууттан (аахпыттан суруйууттан) саҕаланар. Санатан эттэххэ, өйтөн суруйуу (аахпыттан суруйуу) биир кэлим эксээмэҥҥэ киирэр быраабы биэрэр.
СӨ үөрэҕин уонна наукатын миниистирэ Владимир Егоров пресс-конференция кэмигэр: “Хастыы даҕаны оҕону 100 баалга бэлэмниир учууталлар бааллар. М.А.Алексеев аатынан норуодунай бириэмийэни туппут Физика-тиэхиньиичэскэй лиссиэй математикаҕа учуутала Любовь Ивановна Ефремова үс үөрэнээччитэ быйыл 100 баалга туттардылар. Математика уустук биридимиэт эрээри, улахан түмүгү көрдөрдө”, — диэн миниистир бэлиэтээтэ. Өрөспүүбүлүкэ үрдүнэн оҕолору үрдүк баалга бэлэмниир учууталлар аҕыйаҕа суохтарын эттэ.
Үөрэх хаачыстыбатын кэтээн көрөр киин дириэктэрэ Надежда Попова кылгастык быйылгы эксээмэн туһунан билиһиннэрдэ итиэннэ Саха сирин үрдүнэн, уопсайа, 6 кэһии бэлиэтэмммитин иһитиннэрдэ. Итинтэн 2 телефону, 1 смарт-чаһыны, 3 шпаргалканы туһаныы эбит.
Людмила ПОПОВА, “Саха сирэ” хаһыат, edersaas.ru
Ааптар хаартыскаҕа түһэриилэрэ.