Сунтаар улууһун И.Г. Спиридонов аатынан Кириэстээх орто оскуолатыгар “ЭКО” (Эрчимнээх, Көхтөөх Оҕолор) диэн оҕо хамсааһына үлэлиир. Быйылгы үөрэх дьылыгар биир улахан бырайыактара түмүктэннэ. Сэтинньи ыйтан саҕалаан Экология сылыгар аналлаах «III Максимовские чтения: экология Якутии» диэн өрөспүүбүлүкэтээҕи научнай-практическай кэмпириэнсийэни биллэрбиттэрэ. Манна Алмааһы көрдөөһүн историятын мусуойа эмиэ кыттыспыта.
Ангелина ВАСИЛЬЕВА, “Саха сирэ” хаһыат, edersaas.ru
Максимовскай ааҕыылар профессор, дэгиттэр учуонай Григорий Николаевич Максимов кэриэһигэр үһүс төгүлүн ыытыллаллар. Бастакы түһүмэҕэ кэтэхтэн, иккиһэ сирэй кэлэн көмүскээһин этэ. Барыта 19 улуустан 187 оҕо кыттыбыта. Итинтэн иккис түһүмэххэ 65 үлэ ааспыта.
Кулун тутар 24 күнүгэр кэмпириэнсийэ түмүктүүр түһүмэҕэ Кириэстээх орто оскуолатыгар буолан ааста. Манна 13 улуус 31 оскуолатыттан 65 оҕо кытынна.
“Прикладная экология”, “Геоэкология”, “Общая экология”, “Социальная экология”, “Экология начинается со двора”, “Отходы в доходы” диэн сиэксийэлэргэ экспертэр үлэлээтилэр. Оҕолор олус интэриэһинэй бырайыактардаахтар. Кинилэр олорор сирдэрин, тулалыыр эйгэлэрин, аар айылҕаны хайдах ыраастык тутар, харыстыыр туһунан аныгылыы ньымалары туһанан, сонун бырайыактары көмүскээтилэр. Үөрэппит, чинчийбит тиэмэлэригэр дакылааттары аахтылар.
Экспертэр үксүлэрэ Мирнэйтэн кэлбиттэр:
Ботуобуйатааҕы геолого-разведочнай экспедицияттан С.А. Кисляков, Г.А. Федюнина, И.А. Иванова, “Якутнипроалмаз” лабораториятын сэбиэдиссэйэ Н.Е. Кулинич, Мирнэйдээҕи геолого-разведочнай экспедиция гидробиолога Н.А. Иост уонна Мирнэй, Кириэстээх оскуолаларын учууталлара үлэлээтилэр.
Кинилэр бу тэрээһиҥҥэ суолта биэрэн, анаан кэлбиттэрэ мээнэҕэ буолбатах. “Якутнипроалмаз”, Ботуобуйатааҕы, Мирнэйдээҕи геолого-разведочнай экспедициялар, Мирнэйдээ5и политехническэй институт, М.К. Аммосов аатынан ХИФУ партнер быһыытынан үлэлэһэллэр.
Маргарита Жиркова, Кириэстээх орто оскуолатын учуутала, “ЭКО” оҕо түмсүүтүн салайааччы:
—Саамай интэриэһинэйэ, кэмпириэнсийэни барыта оҕолор уонна үс салайааччы: мин, Н.В. Усова, Д.М. Романова уонна мусуой дириэктэрэ Марфа Христофоровна Конобулова тэрийэн ыыттыбыт. Оҕолорбут олох барытыгар тэбис-тэҥҥэ сырыттылар, сайт оҥоһуутуттан эксперт үлэтигэр тиийэ, туох баар ымпыгын-чымпыгын барытын ааһан, тэрээһин үлэтин ыытыстылар. Онтон бэйэлэрэ даҕаны астыннылар.
Оҕо түмсүүтүгэр 5-с кылаастан саҕалаан бааллар. Сайын лааҕыр арыйан үлэлэппиппит. Мантан саас экологическай десаннары оҥортуохпут, ыраастаныы үлэтигэр кыттыһыахпыт, о.д.а. былааннардаахпыт.
Ангелина ВАСИЛЬЕВА, “Саха сирэ” хаһыат, edersaas.ru