Дьокуускайбыт төһө ыраас куоратый? Куорат чанчарык олохтоохторун уонна ыалдьыттарын харыстабыла суох быһыыларыгар үҥсэргии барбакка, хас биирдии бэйэбититтэн саҕалыырбыт ордук буолуо.
Аһы-үөлү, малы-салы сиэрдээхтик тутуннахха төһөлөөх экономия, туһа тахсыа этэй, холобур, биир хаһаайка полиэтилен суумкалары туттартан аккаастаннаҕына биир ыйга 50 лиитэрэ ньиэби харыстыыр эбит.
Дьокуускайга бөҕү көрүҥүнэн арааран переработкаҕа туттарар дьон ахсаана күннэтэ элбээн иһэр. Кинилэр иккистээн переработкаланар хахтаах бородууксуйалары атыылаһалларын ордороллор, онтон иккистээн туттуллубат полиэтилен суумкаларынан, пакеттарынан, сууларынан араас илиинэн оҥоһуктары айан соһуталлар.
Ону сэргэ, итинник переработкаламмат суулаах бородууксуйалары атыылыыртан аккаастанар санаалаах урбаанньыттар баар буолан эрэр буоллахтарына, ол аата айылҕаны харыстыыр хамсааһын далааһыннанан эрэр туоһута буолар.
— Наталья Александровна, пандемия, карантин хас биирдиибитигэр судургута суох кэмигэр эко-атыыны, хамсааһыны саҕалыыр ороскуоттаах быһаарыныы буолбатах дуо? — диэн “777” мини-маркет ситимин хаһаайката, урбаанньыт Наталья Храмцоваттан ыйытабын.
— Маннык эко-хамсааһыҥҥа уруккуттан кыттыһыахпын саныыбын. Наһаа уһуннук хомуммакка, айгыстыбакка саҕалыыр кэм кэллэ. Быйылгы дьаҥ кэмигэр сиргэ наһаа элбэх киһи баарыттан тыынар тыыннаах барыта сүһүрэн эрэр, ол иһин айылҕа дьону бэйэтин дьаалытынан аҕыйатан эрэр диэн санаа элбэхтэ этилиннэ. Оттон мин санаабар, сүрүн кыһалҕа киһи элбэҕэр буолбатах. Биһиги күннэтэ наһаа элбэх туһата суох малы оҥорон таһаарабыт уонна ол маллары суулуур соччо элбэх хах, суу. Айылҕа баайа бөҕү оҥорон таһаарарга туһаайыллар буолла.
— Бу эн гражданскай позицияҥ буолар дуо?
— Оннук, барыс эрэ туһунан толкуйдаабакка, туох эрэ туһалааҕы оҥоро сатыырга дьулуһабын. Сотору кэминэн дьон өйө-санаата уларыйыа, ол түмүгэр сиэрэ суох элбэҕи туһанарын тохтотон тулалыыр эйгэтигэр харыстабыллаахтык сыһыаннаһыа. Бу коронавирус дьаҥа ону ырылаччы көрдөрдө: маннык тургутуулаах кэмҥэ дьон наадыйарын эрэ атыылаһар буолар.
— Эһиги маҕаһыыннаргытыгар эко-атыы хайдах быһыылаахтык оҥоһуллуой?
— Бастатан туран, сыыйа-баайа полиэтилен бакыаттары туттан бүтүөхпүт, ол оннугар атыылаһааччыларбыт араас көрүҥнээх эко-суумкалары уонна кумааҕы суулары туттуохтара. Иккистээн переработкаланар хахтаах бородуукталары атыыга таһаара сатыахпыт, онтон сотору кэминэн атыылаһааччылар ириис, гречка, саахар, бурдук курдук ыйааһыннанар бородуукталары анал таҥас суумкаларга куттан ылар кыахтаныахтара. Чэ, быһата, элбэх социальнай уларыйыылары оҥорорго былааннанабыт.
— Урбаанньыттарга маннык тэринии ночооттоох буолуо суоҕа дуо?
— Урбаан эйгэтигэр барытын харчынан кээмэйдиир сыыһа, тулалыыр эйгэҕэр, дьоҥҥор туһалыыр эрэ буоллаххына үлэҥ тахсыылаах буолар. Уонна мин санаабар, сотору кэминэн маннык тэринии булгуччулаах ирдэбил буолуо.
— Бу аахсыйаҕытыҥ туохтан саҕалыыгыт?
— “Мин эко-суумкам” диэн айар күрэс кыттыылаахтарыгар босхо 50 суумка түҥэтиэхпит. Бу суумкалары биһиги биир үлэһиппит кыыс босхо тигэн биэрэн, эко-хамсааһыҥҥа бэйэтин сэмэй кылаатын киллэрдэ.
— Күрэскэ кыттарга тугу гыныахха нааданый?
— «Инстаграмҥа» @777minimarket_ykt диэн страницаҕа сурутаҕыт. Бэлэм суумканы биһиги маҕаһыыммытыттан, Богдан Чижик аатынан уулусса 33 б, 1 тутуу аадырыстан ылан хайдах баҕараргытынан киэргэтэҕит: уруһуйдуугут, быысабайдыыгыт, аппликациялыыгыт, тигэҕит — тугу гынаргыт бэйэҕит көҥүлгүт, манна хааччах суох. Бэлэм суумканы сүгэн турар хаартысканы «инстаграмҥа» страницаҕытыгар #якутскбеzпакетов диэн хэштегтээх таһаараҕыт.
Икки нэдиэлэнэн кайыылаахтар быһаарыллыахтара. Бастакы кыайыылааҕынан саамай элбэх «сүрэҕи» хомуйбут киһи ааттаныа, иккис кыайыылааҕы «рандом» бырагыраама быһаарыа уонна үһүс кыайыылаах үлэтин дьүүллүүр сүбэ талыа. Кыайыылаахтары сүрдээх үчүгэй бириистэр күүтэллэр.
— Маннык үчүгэй саҕалааһыны киэҥник тарҕатарга ааттаах-суоллаах дьоммут өйүүллэрэ буолуо.
— Бииргэ үлэлэһэргэ бэлэммит, ким баҕар 8-914-280-73-33 нүөмэринэн билсэн бэйэтин этиитин киллэриэн сөп.
— Атын маҕаһыыннар эһиги хамсааһыҥҥытыҥ өйөөн кыттыһыахтара дии саныыгыт дуо?
— Мин билэрбинэн, сорох маҕаһыыннар кумааҕы бакыаттары атыыга таһааран эрэллэр. Онон сылыктаатахха, айылҕабытын, тулалыыр эйгэбитин харыстыырга өй-санаа өттүнэн бэлэммит, бары бииргэ турунан үлэлээтэхпитинэ Дьокуускайбыт, Сахабыт сирэ, бүттүүн дойдубут ырааһырыа, тупсуо диэн эрэллээхпин.
— Маннык үтүө аахсыйаны саҕалаабыккытыгар махтанабын!
edersaas.ru