Эйигин таҥара оҥостон…

Бөлөххө киир:

«Күн күбэй ийэкэм барахсан, эйигин таҥара оҥостон…»  диэн Ийэ күнүгэр аналлаах нэдиэлэ Таатта улууһун Дьохсоҕон нэһилиэгэр олус сэргэхтик салҕанар.


—Нэһилиэк олохтоохторо, оскуола үөрэнээччилэрэ «Ийэлэр дьикти дьарыктара»  диэн кэллиэксийэлиир ийэлэр, эбээлэр быыстапкаларыгар сырыттылар, — диэн кэпсиир бибилэтиэкэ сэбиэдиссэйэ  Галина Другина. —Ол курдук, нэдиэлэ чэрчитинэн, Харбалаах бөһүөлэгиттэн Изабелла Харлампьева салайааччылаах «Дьоһун дьарык» диэн кэллиэксийэньиэрдэр түмсүүлэрин ыҥыран ыалдьыттаттыбыт.  Быыстапка Алампа аатынан норуот айымньытын дьиэтигэр буолла.  Ыалдьыттар «Кэллиэксийэ — киһи олоҕор»  тиэмэнэн 45 араас эгэлгэ кэллиэксийэлэрин аҕалбыттара болҕомтону тарта.

Бу үөрүүлээх күн «Мин ийэм — күн курдук» диэн ааттаах «Куорсун» литературнай түмсүү интэриэһинэй көрсүһүүнү тэрийдэ. Хомоҕой хоһоон хонуутун биир бастыҥ кыттааччыта, бэтэрээн учуутал Альбина Тарбахова «Дьохсоҕоммут» диэн хоһоонугар Алексей Калининскай-Луҥха Өлөксөй  матыып суруйбута. Тэрээһин бу ырыаны Суорун Омоллоон аатынан  опера уонна балет тыйаатырын солиһа Николай Попов толоруутун истииттэн саҕаланна. Салгыы түмсүү кыттыылааҕа, ытык кырдьаҕас Иван Бочонин Алампаҕа анаабыт хоһоонун дорҕоонноохтук ааҕан иһитиннэрдэ. Валентина Пинигина-Арылы «Тобуруокап көмүс күһүнэ» өрөспүүбүлүкэтээҕи тэрээһиҥҥэ сылдьыбытын, Мария Лопатырева-Сайылык кыыһа С.Р.Кулачиков-Эллэй төрөөбүтэ 115 сылыгар уонна Р.А.Кулаковскай төрөөбүтэ 105 сылыгар анаммыт литература куонкуруһугар кыттан Кылаан бирииһи ылар чиэскэ тиксибитин,  Дьохсоҕон кыыһа Өймөкөөҥҥө олоҥхону кытта сибээстээх үлэлэрин туһунан сырдаттылар. Түһүлгэ бары кыттыылаахтара ийэлэригэр анаабыт хоһооннорун улаханнык долгуйан туран аахтылар. Ыалдьыппыт Изабелла Викторовна эмиэ бэйэтин айымньыларыттан ааҕан иһитиннэрдэ. Салгыы Дьохсоҕон кыыһа ийэтигэр анаан суруйбут «буруолаабытынан» хоһоонун оскуола үөрэнээччилэрэ  Айтал Попов уонна Арсен Матвеев нуучча, англия тылларынан дорҕоонноохтук аахтылар.  Оҕолору оскуолаҕа быйыл саҥа үлэлии кэлбит омук тылын учуутала Татьяна Кычкина кыһаллан бэлэмнээбитэ бэлиэтэннэ.  Оттон бу хоһоонун ааптар төрөөбүт тылынан аахта.  Оскуола бэһис кылааһын үөрэнээччилэрэ  норуот чабырҕаҕын бэркэ табыллан, киһи эрэ сэргээн истэрин курдук ааҕан хайҕаннылар.  Ааҕар оҕолор бөлөхтөрүн  «Куорсун» түмсүү  «Сатабыл» оҕолорго аналлаах куруһуогун салайар саха тылын уонна литературатын учуутала Мария Сивцева уонна оскуола педагог-бибилэтиэкэрэ Лариса Саввина сатабыллаахтык салайаллар. Бу күн түһүлгэҕэ мустубут дьон ийэҕэ анаммыт истиҥ хоһооннору, намыын ырыалары  астына-дуоһуйа иһиттилэр. Ытык Күөлтэн  айар дьоҕурдаахтар «Уран тыл» түмсүүлэрин аатыттан кытта кэлбит Василий Стручков-Сахамыын айымньыларын аахта, гитаранан доҕуһуоллаан олус истиҥник ыллаата.

«Кэрэли» кырасыабай оҥорор устуудьуйа маастардара Андреанна Поленова, Анастасия Максимова  ийэлэргэ кэрэ сэбэрэлэрин өссө тупсаран, киэргэтэн биэрдилэр. Ити курдук нэһилиэк ийэлэригэр аналлаах умнуллубат дьоро күн буолла, — диэтэ, түгэнинэн туһанан, үөрүүлээх тэрээһиннэрин киэргэппит бары ыалдьыттарыгар, көмөлөспүт, өйөбүл буолбут дьонноругар барҕа махталларын тиэртэ.

Сардаана БАСНАЕВА, «Саха сирэ» хаһыат, edersaas.ru

+1
0
+1
0
+1
0
+1
0
+1
0
+1
0
+1
0