“Улахан быһаарыныыларбын соһуччу ылынар идэлээхпин. Өрөспүүбүлүкэ салалтатыгар олорор киһи бэйэм эрэ туспун буолбакка, бар дьонум, дойдум туһун бастакы уочарат саныахтааҕым”, — диэн этэр Егор Борисов “Саха” НКИХ “Аһаҕас кэпсэтии” биэриитигэр.
edersaas.ru
“Үлэлээбитим тухары дьонум-сэргэм, дойдум туһугар диэн санаанан салайтаран кэлбит буоламмын, элбэҕи толкуйдаан баран, бу маннык быһаарыныыны ылынан турабын. Улахан быһаарыныыларбын соһуччу ылынабын. Ол иһин норуотум иннигэр быһааран биэриэхпин баҕарабын”, — диэн саҕалыыр кини.
“Бу быһаарыныыны ылынарбар туох төрүөт буолбутай? Бастатан туран, Ил Дархан дуоһунаһыгар бүтэһик болдьоҕум буоларын өйдүүрүм. Эһиил быыбарга кыттыбаппын билэрим. РФ бэрэсидьиэнэ Владимир Путин улахан сыалы-соругу туруорда. Ол соруктары толорууга бу күннэргэ элбэх дьаһаллар ылыныллаары тураллар. Онно тустаах бырагыраамалар оҥоһуллуохтара, ону олоххо киллэрии барыаҕа. Мин быйыл быһаарымматаҕым буоллар, быыбар эһиил буолуо этэ. Саҥа киһи кэлэн балаһыанньаны ортотуттан билсэ сырыттаҕына өрөспүүбүлүкэҕэ сүүйтэриилээх буолсу диэн өйгө-санааҕа кэлбитим. Иккиһинэн, бэйэм үлэбэр-хамнаспар каадырдары аттаран туруорууга уларытыы син-биир киириэхтээх диэн санаалаахпын. Россия бэрэсидьиэнэ каадырдары аттаран туруоруу үлэтин ыытта. Регион салайааччыларыгар эдэр дьон кэллилэр. Ону туһаныахпытын наада этэ. Онон билигин биһиэхэ эдэр киһи анаммыта үчүгэй. Сүрүннээн бу икки төрүөтүнэн салайтаран быһаарыныы ылынным. Дьонум-сэргэм ону табатык өйдөөбүттэриттэн, социальнай ситимнэр нөҥүө, бэйэбэр эрийэн санааларын эппиттэриттэн биир бэйэм улаханнык астынан олоробун”, — диэн этэр кини.
Аграфена КУЗЬМИНА, “Саха сирэ” хаһыат.