Егор Борисов: «Бырапыыската суох дьоҥҥо көмө көрүллүөҕэ»...
Олох-дьаһах

Егор Борисов: «Бырапыыската суох дьоҥҥо көмө көрүллүөҕэ»

Бэҕэһээ Ил Дархан Егор Борисов РФ ыксаллаах быһыыга-майгыга миниистирин э.т. Владимир Пучкову кытары Аммаҕа сылдьан нэһилиэнньэни кытары көрүстүлэр, Дьокуускайга мунньах ыыттылар. Саха сирин ууга барбыт улуустарыгар федеральнай таһымнаах ыксаллаах быһыы-майгы биллэрилиннэ.

“Ууга ылларбыт сирдэрбитигэр өрөспүүбүлүкэ таһымыгар ыксаллаах быһыыны-майгыны биллэрбиппит. Ол эрээри хоромньубут да, ууга ылларбыт сирбит да элбэх. Онон бу күннэргэ ыксаллаах быһыыны-майгыны федеральнай таһымҥа биллэрэр ордук буолуоҕа. Бу туһунан РФ ыксаллаах быһыыга-майгыга миниистирин э.т. Владимир Пучкову кытары кэпсэппиппит”, — диэн иһитиннэрэр Егор Борисов бэҕэһээ мунньах кэмигэр.
Ил Дархан ууга барбыт дьоҥҥо көмө туһунан этэригэр, бастатан туран, былаас уорганнарын өттүттэн болҕомто күүһүрүөхтээҕин, хас биирдии киһиттэн киирбит этии, көмө көрдөөһүн барыта болҕомто киинигэр сылдьыахтааҕын бэлиэтээтэ.
“Судаарыстыбаҕа дьон күүскэ эрэнэр. Дьоҥҥо көмөлөһүүгэ хас биирдии министиэристибэ, биэдэмистибэ кыттыгастаах буолуохтаах. Онон министиэристибэлэр, биэдэмистибэлэр бэйэҕит хайысхаҕытынан көрөн, дьоҥҥо көмөлөһүҥ. Уопсастыбаннай түмсүүлэр кыһалҕаҕа кыттыһан номнуо бэйэлэрин кылааттарын киллэрэн эрэллэр. Холобур, билигин биир дойдулаахтар түмсүүлэрэ көмөнү оҥорууга актыыбынайдык ылыста, бу үлэлэрин өссө кэҥэтиэхтэрэ диэн эрэнэбин. Сибээс туһунан эттэххэ, нэһилиэнньэҕэ сибээс хайа да түгэҥҥэ баар буолуохтаах. Уот барарыттан, барбатыттан тутулуга суох”, — диэн этэр кини.

Аммаҕа сырыы кэмигэр

Оттон биирдиилээн көмө туһунан этэригэр билигин ууга барбыт сирдэргэ миэстэтигэр исписэлиистэр тиийэн испииһэги оҥоро, төһө хоромньу тахсыбытын ааҕа сылдьалларын этэн туран: “Эмсэҕэлээбиттэр ыам ыйынааҕы төлөбүрдэри, биэнсийэни, хамнаһы, эрдэ ылыахтара. Ону таһынан бырабыыталыстыба үбүн-харчытын мунньунан көмөнү оҥоруоҕа. Манна даҕатан, дьиэлэригэр прописката суох дьоҥҥо туспа испииһэк оҥоһулларын, кинилэр бары көмө ылыахтарын, итиннэ барытыгар нэһилиэктэри, улуустары кытары федеральнай структуралар күүскэ үлэлэһиэхтэрин этэр тоҕоостоох. Кыһалҕаны кумааҕы эрэ өттүнэн үрдүнэн-аннынан көрүмэҥ, кыһалҕалаах дьон боппуруостарын биирдиилээн көрүҥ. Саха дьоно кыһалҕаҕа түмсэ түһэр үтүө үгэстээхпит. Бу да сырыыга баар кыһалҕаны туораттан көрөн олорбокко, бары куолаан туоратыахпыт дии саныыбын”, — диэн иһитиннэрдэ.
Санатан эттэххэ, өрөспүүбүлүкэҕэ билигин 120 мөл. солк. резервэ оҥоһулунна.

Аграфена КУЗЬМИНА, edersaas.ru

0
0

Сайт матырыйаалларын ааптар көҥүлэ суох ылар бобуллар.

Ваш e-mail не будет опубликован.

8 + 4 =